Finlandiya dondurucu soyuqlarına və qaranlıq qışlarına baxmayaraq, Dünya Xoşbəxtlik Hesabatında 7 il ardıcıl olaraq birinci yeri tutub. Əlbəttə, pulsuz təhsil, güclü səhiyyə sistemi və bol məzuniyyət imkanları kimi struktur faktorlar bu uğurda böyük rol oynayır. Lakin fin xalqını zirvəyə daşıyan əsas amil onların gündəlik həyat vərdişləri və fəlsəfələridir.
Fin ruh sağlamlığı mütəxəssislərinə görə, həyatınıza uyğunlaşdıra biləcəyiniz 6 fin xoşbəxtlik sirri var:
Rol etməyi dayandırmaq
Bir çox mədəniyyətdən fərqli olaraq, Finlandiyada “məcburi pozitivlik” anlayışı yoxdur. “Necəsən?” sualına “Yaxşı deyiləm” və ya “Özümü pis hiss edirəm” cavabını vermək tamamilə normal qarşılanır.
Araşdırmalar göstərir ki, mənfi duyğuları basdırmaq insanın özünü çıxılmaz vəziyyətdə hiss etməsinə, sosial əlaqələrinin zəifləməsinə və hətta erkən ölüm riskinin artmasına səbəb olur.
Qatı iş-həyat balansı
Finlər çox işləyirlər, amma iş saatları normaldır və evə dönüş yolları qısadır.
Qısa gediş-gəliş müddəti və dəqiq iş saatları insanlara gün ərzində özlərinə vaxt ayırmaq, dincəlmək və işdənkənar hobbilərlə məşğul olmaq üçün ciddi boş zaman yaradır.
Təbiətə pulsuz çıxış
Finlandiyada “Hər kəsin haqqı” (Everyman’s Right) adlanan qaydalar sayəsində meşələr, göllər və sahillər hər kəs üçün pulsuzdur. Hətta böyük şəhərlərdə belə təbiətə çatmaq cəmi bir neçə dəqiqə çəkir.
Elmi araşdırmalar sübut edir ki, təbiətdə vaxt keçirmək stressi birbaşa azaldır. Daha az stress isə xoşbəxtliyə aparan ən qısa yoldur.
Ömürboyu öyrənmə mədəniyyəti
Ölkədə yeni şeylər öyrənmək (yeni resept sınamaq, keramika kursuna getmək və ya yelkən sürməyi öyrənmək) yüksək dərəcədə təşviq olunur. İnsanların ucuz qiymətlərlə sosiallaşdığı və hobbi qazandığı saysız-hesabsız dərnəklər mövcuddur.
Rutindən çıxaraq yeni bacarıqlar əldə etmək, vaxtın daha dolu və məhsuldar keçdiyi hissini yaradır.
Yüksək ictimai etibar və güclü əlaqələr
Kiçik ölkə olan Finlandiyada insanlar arasındakı etibar səviyyəsi çox yüksəkdir. Mütəxəssislər buna “zəif bağların gücü” deyirlər.
Araşdırmalar göstərir ki, tənhalıq həyat məmnuniyyətini zəiflədən ən güclü amillərdən biridir. Təhlükəsiz mühitdə, sevdikləri ilə bağ quran insanlar özlərini daha xoşbəxt hiss edirlər.
Güclü coşqu yerinə “sakit məmnunluq”
Fin mədəniyyətində xoşbəxtlik davamlı olaraq çılğın əylənmək və ya həddindən artıq coşqu yaşamaq demək deyil. Onların xoşbəxtlik anlayışı həyatdan və sahib olduqlarından sakit bir məmnunluq hiss etməkdir.
Davamlı zirvə duyğularının arxasınca qaçmaq əvəzinə, yaxşı bir fincan qəhvə və ya problemsiz işləyən avtomobil kimi kiçik şeylərdən zövq almaq xoşbəxt olmağı asanlaşdırır.
Belə görünür ki, finlərin xoşbəxtlik sirri möhtəşəm həyat yaşamaqda deyil, sadə və balanslı gündəlik vərdişlərdə gizlənir. Özünə qarşı dürüst olmaq, təbiətlə yaxınlıq, iş və şəxsi həyat arasında tarazlıq qurmaq, yaxın insanlarla münasibətləri qorumaq və kiçik şeylərdən zövq almaq — bəlkə də xoşbəxtliyin ən real formuludur. Finlandiyanın illərdir zirvədə qalması da göstərir ki, həqiqi məmnunluq bəzən ən sadə həyat tərzində gizlənir.
Həmidə İbrahimova
