Səyahət eksperti Meri Novakoviç 2026-cı ilin yay istirahəti üçün ən yaxşı istiqamətlərin siyahısını dərc edib. Siyahı müxtəlif büdcələrə uyğun yeddi məkanı əhatə edir.
HİT.az xəbər verir ki, bu barədə "The Independent" yazıb.
Ekspert qeyd edir ki, may bayramlarında müşahidə olunan xoş hava bir çox insan üçün yay tətilini indidən planlaşdırmaq üçün yaxşı fürsətdir.
Seçimlər arasında həm cütlüklər, həm ailələr, həm də macəra axtaran səyahətçilər üçün istiqamətlər yer alır.
Fransa
Əsl fransız yayını, şərab, bazarlar və günəş axtaranlar üçün ölkənin cənubundakı Langedok bölgəsi tövsiyə olunur. Burada yerləşən "Wine Terrace" villası üzüm bağları ilə əhatə olunmuş altı otaqlı tarixi bir binadır.
Kompleksdə iki kottec var və qonaqlar açıq sahə, terrasa və hovuzu paylaşırlar. Yaxınlıqda yerləşən Pezenas şəhəri isə həftəsonu bazarı və yerli delikatesləri ilə tanınır. İyul ayında "Vintage Travel" vasitəsilə kirayə qiyməti həftəlik təxminən 2600 avrodan başlayır.
İtaliya
Cənubi İtaliyanın Apuliya bölgəsi son illərin ən populyar istiqamətlərindən biridir. Burada firuzəyi dəniz, zeytun bağları və orta əsr şəhərləri turistləri cəlb edir.
Spongano şəhərində yerləşən XIX əsrə aid "Casa Cosima" evi bərpa olunmuş tarixi interyerini qoruyub saxlayır. Üç yataq otaqlı ev altı nəfəri qəbul edir və şəxsi həyət hovuzu ilə təchiz olunub. İyul ayında həftəlik kirayə qiyməti təxminən 3760 avrodan başlayır.
Vayt adası (Böyük Britaniya)
Vayt adasında yay ayları daha sakit və yaşıl keçir. Burada diqqətçəkən variantlardan biri də su üzərində yerləşən yaşayış evində qalmaqdır.
"Unique Hideaways" tərəfindən təqdim edilən "Oystercatcher" adlı üzən ev üç yataq otağı və terasla təchiz olunub. Qiymət yeddi gecə üçün təxminən 2700 avrodur.
Mavriki
İsti hava və ekzotik tətil istəyənlər üçün Mavriki ideal seçim hesab olunur. Ada kreyol, Çin və fransız mətbəxinin qarışığı və sakit atmosferi ilə tanınır.
"Veranda Grand Baie" oteli Qrand-Bey körfəzində yerləşir və iki hovuz, açıq restoranlar təklif edir. İyul ayında bir həftəlik qalma qiyməti adambaşına təxminən 1280 avrodan başlayır.
Yunanıstan
Egey dənizinin şərqində yerləşən Samos adası daha az turist qəbul etməsi ilə seçilir. Ada üzüm şərabı, dağ kəndləri və təmiz çimərlikləri ilə tanınır.
"Eleonos" villalarında qalmaq mümkündür. Dənizə yaxın yerləşən bu evlər şəxsi hovuz və panoramik mənzərə ilə təmin olunur. Qiymətlər iki nəfər üçün təxminən 3800 avrodan başlayır.
Böyük Britaniya – Kornuoll
Kornuoll Atlantik okeanının sahilində yerləşən təbii mənzərələri ilə seçilir. Burada sörfinq, qayalı sahillər və dəniz məhsulları turistləri cəlb edir.
"SeaSpace" apartamentləri sahil qayalıqlarında yerləşir və otel xidmətləri ilə təchiz olunub. Gecəlik qiymət təxminən 370 avrodan başlayır.
Keniya və Zənzibar safari turu
Macəra axtaranlar üçün 13 günlük kombinasiya turu təklif olunur. Səfər Masai-Mara qoruğunda safari ilə başlayır, daha sonra Zənzibarda dəniz istirahəti ilə davam edir.
Turun qiyməti bir nəfər üçün 8070 avrodan başlayır və uçuşlar, transferlər, yaşayış və ekskursiyaları əhatə edir.
Samir
