Fransada saxlanılan tanker qlobal “kölgə donanma” şəbəkəsi ilə bağlı araşdırmalara daxil edilib...
Poliqon xəbər verir ki, Euronews telekanalının məlumatına əsasən, Fransanın saxladığı “Tagor” tankerinin İranlı neft ticarətçisi Məhəmməd Hüseyn Şamxani ilə əlaqəli olduğu iddia edilir. Şamxani Rusiya və İran neftinin ixracında vasitəçilik edən geniş gəmiçilik şəbəkəsinin əsas fiqurlarından biri kimi göstərilir.
Məlumata görə, Şamxani İranın Ali Milli Təhlükəsizlik Şurasının keçmiş katibi Əli Şamxaninin oğludur və o, Birləşmiş Ərəb Əmirliklərində fəaliyyət göstərən geniş logistika və gəmiçilik şirkətləri şəbəkəsi qurub. Bu strukturun beynəlxalq enerji ticarətində, xüsusilə sanksiyalardan yayınma ilə bağlı əməliyyatlarda istifadə edildiyi iddia olunur.
Euronews yazır ki, 2025-ci ilin iyulunda Avropa İttifaqı Şamxani və onun biznes şəbəkəsinə daxil olan bir neçə şirkətə, o cümlədən Admiral Group və Milavous Group-a sanksiyalar tətbiq edib. Aİ Şamxanini Rusiya “kölgə donanması”nın əsas iştirakçılarından biri kimi qiymətləndirib.
Bununla belə, Fransa rəsmiləri hələlik “Tagor” tankerinin birbaşa Şamxaniyə məxsus olduğunu rəsmi şəkildə təsdiqləməyiblər. Araşdırmaların davam etdiyi bildirilir.
Ekspertlərin fikrincə, bu iş qlobal enerji bazarlarında sanksiyalardan yayınma mexanizmləri və qeyri-şəffaf logistika şəbəkələrinin roluna dair beynəlxalq nəzarətin gücləndiyini göstərir.
Poliqon.info
