Ukrayna ordusu Rusiya ilə müharibənin xarakterini mərhələli şəkildə dəyişir, əsas diqqəti pilotsuz uçuş aparatlarının geniş tətbiqinə və düşmənin logistika qovşaqlarına zərbələr endirilməsinə yönəldir...
Poliqon xəbər verir ki, ukraynalı yazıçı və The Hill nəşrinin köşə yazarı İqor Bondarın fikrincə, yeni taktika artıq yalnız cəbhədəki vəziyyətə deyil, həm də Rusiya rəhbərliyinin davranışına təsir göstərir.
Ukrayna pilotsuz aparatlarının son dövrlərdə Rusiyanın dərin arxa cəbhəsində yerləşən obyektlərə hücumları Ukrayna Silahlı Qüvvələrinin min kilometrlərlə məsafədə zərbə endirmək qabiliyyətini nümayiş etdirib. Hədəflər arasında Rusiya iqtisadiyyatı və hərbi logistikası üçün mühüm əhəmiyyət daşıyan neft terminalları və liman infrastrukturu da olub.
Xüsusilə, Ukrayna qüvvələri dəfələrlə Tuapse neft terminalına hücum edib, həmçinin Primorsk və Ust-Luqa limanlarına zərbələr endirib.
Bununla yanaşı, Ukrayna pilotsuz aparatları cəbhə xəttindən uzaqda yerləşən hava hücumundan müdafiə sistemlərini və digər hərbi obyektləri də hədəfə alır.
Ukrayna getdikcə klassik hücum əməliyyatlarından uzaqlaşaraq "texnoloji mühasirə" adlandırılan modelə keçir. Bu yanaşmanın mahiyyəti şəhərləri tank və piyadalarla mühasirəyə almaq deyil, dronlar vasitəsilə düşmənin logistikasını bloklamaqdan ibarətdir.
Bu taktika artıq işğal olunmuş ərazilərdə nəqliyyat marşrutlarına nəzarəti gücləndirməyə və Rusiya texnikası ilə sursatlarının daşınmasında ciddi çətinliklər yaratmağa imkan verir.
Ukraynanın zərbələri fonunda Rusiya lideri Vladimir Putinin ritorikasında da dəyişiklik müşahidə olunur. Əvvəllər o, Ukrayna hakimiyyətinə qarşı mütəmadi olaraq təhqiramiz ifadələr işlədirdisə, son vaxtlar Ukrayna Prezidenti Volodimir Zelenski barədə daha ehtiyatlı danışmağa başlayıb və hətta şəxsi təmasların mümkünlüyünü istisna etməyib.
Müşahidəçilər bunu Rusiya ərazisinə yönələn təhdidlərin artması və ölkənin hərbi maşınının verdiyi nəzərəçarpacaq itkilərlə əlaqələndirirlər.
Bondarın sözlərinə görə, uzun müddətdən sonra ilk dəfədir ki, Rusiya qoşunları problemlərlə yalnız döyüş meydanında deyil, arxa cəbhədə də üzləşirlər. Onun qiymətləndirməsinə əsasən, logistikaya zərbələr, şəxsi heyət itkiləri və resursların tədricən tükənməsi Moskvanın mövqelərinin zəiflədiyini göstərir.
"Ukrayna ordusu müharibə aparmaq taktikasını dəyişərək işğal olunmuş ərazilərin texnoloji mühasirəsi modelini tətbiq edir", deyə müəllif qeyd edir.
Onun fikrincə, mövcud tendensiya davam edərsə, işğal olunmuş ərazilər Rusiya qoşunları üçün daimi təhlükə zonasına çevrilə bilər, Rusiya isə müharibəni davam etdirməkdə getdikcə daha böyük çətinliklərlə üzləşəcək.
Poliqon.info
