Dövlət başçısı cənab İlham Əliyev Bakı Enerji Həftəsindəki çıxışında Azərbaycanın qlobal enerji təhlükəsizliyinə verdiyi töhfələrin son illərdə əhəmiyyətli dərəcədə artdığını vurğuladı. Möhtərəm Prezidentin fikrincə, enerji təhlükəsizliyi artıq yalnız iqtisadi məsələ deyil, həm də beynəlxalq sabitlik və milli təhlükəsizlik amilinə çevrilib. Xüsusilə Yaxın Şərqdə davam edən geosiyasi gərginliklər enerji təchizatının etibarlılığının nə qədər vacib olduğunu bir daha nümayiş etdirir. Azərbaycanın bu sahədə uğurlarının əsasını uzunmüddətli və strateji enerji siyasəti təşkil edir. Ölkə müstəqilliyinin ilk illərindən başlayaraq enerji resurslarının dünya bazarlarına çıxarılması üçün geniş infrastruktur şəbəkəsi formalaşdırıb.
Bakı-Tbilisi-Ceyhan neft kəməri, Bakı-Supsa neft kəməri, Cənubi Qafqaz Boru Kəməri, TANAP və TAP kimi layihələr Azərbaycanın enerji diplomatiyasının əsas sütunlarını təşkil edir. Bu layihələr Xəzər hövzəsini Avropa bazarları ilə birləşdirərək enerji marşrutlarının şaxələndirilməsinə mühüm töhfə verib. Cənab Prezident qeyd etdi ki, hazırda Azərbaycan qazı alan ölkələrin sayı 16-ya çatıb və onların 10-u Avropa İttifaqının üzvləridir. Bu göstərici Azərbaycanın Avropanın enerji təhlükəsizliyində strateji tərəfdaşa çevrildiyini nümayiş etdirir. Son illərdə Avropada enerji təchizatının şaxələndirilməsi siyasətinin güclənməsi fonunda Azərbaycan etibarlı və uzunmüddətli təchizatçı kimi xüsusi əhəmiyyət qazanıb. Çıxışda gələcək perspektivlərə də toxunuldu.
Dövlət başçısı Azəri-Çıraq-Günəşli dərin qaz layihəsi, Abşeron qaz yatağı və digər perspektivli yataqlar hesabına qaz hasilatının artırılacağını bildirdi. Bu layihələr Azərbaycanın enerji ixrac potensialını genişləndirməklə yanaşı, beynəlxalq enerji bazarında mövqeyini daha da gücləndirəcək. Prezidentin çıxışında diqqət çəkən digər məqam Azərbaycanın artıq yalnız xarici investisiyalar qəbul edən deyil, həm də xaricə sərmayə yatıran ölkəyə çevrilməsi oldu.
SOCAR tərəfindən Yaxın Şərq, Afrika və Mərkəzi Asiya regionlarında həyata keçirilən investisiyalar Azərbaycanın enerji şirkətinin qlobal fəaliyyət miqyasının genişləndiyini göstərir. Bu, ölkənin enerji sektorunda qazandığı təcrübənin və maliyyə imkanlarının beynəlxalq səviyyəyə çıxmasının göstəricisidir. Azərbaycan eyni zamanda Mərkəzi Asiya ilə Avropa arasında mühüm enerji və nəqliyyat körpüsü rolunu oynayır. Xəzər dənizinin şərq sahilində yerləşən tərəfdaş ölkələrin neftinin Azərbaycan üzərindən dünya bazarlarına daşınması ölkənin tranzit əhəmiyyətini artırır. Gələcəkdə təbii qaz sahəsində də oxşar əməkdaşlıq imkanlarının genişlənəcəyi gözlənilir. Prezident İlham Əliyev çıxışında enerji siyasətinin yalnız hasilat və ixracla məhdudlaşmadığını da vurğuladı. Azərbaycanın enerji strategiyası emal sənayesinin inkişafını, neft-kimya məhsullarının istehsalını, elektrik enerjisi ixracını və bərpaolunan enerji layihələrinin genişləndirilməsini də əhatə edir. Xüsusilə SOCAR-ın beynəlxalq emal imkanlarının genişləndirilməsi ölkənin enerji dəyər zəncirində daha yüksək mövqe tutmaq niyyətini nümayiş etdirir. Beləliklə, Bakı Enerji Həftəsində səsləndirilən fikirlər göstərir ki, Azərbaycan artıq yalnız enerji resurslarına malik ölkə deyil, həm də regional və qlobal enerji təhlükəsizliyinin formalaşmasına təsir edən mühüm strateji aktordur. Ölkənin enerji siyasəti hasilat, nəqliyyat, emal, investisiya və yaşıl enerji istiqamətlərini birləşdirən kompleks inkişaf modeli kimi beynəlxalq miqyasda diqqət çəkməyə davam edir.
Fərqanə Ağalarova
Neftçala rayonu
