Polşada müxalif “Qanun və Ədalət” (PiS) partiyasını təmsil edən siyasətçi Pşemıslav Çarnek Ukrayna Prezidenti Vladimir Zelenskinin siyasətini tənqid edən açıqlama ilə çıxış edib.
Çarnek bildirib ki, Rusiya-Ukrayna müharibəsinin ilk dövrlərindən etibarən Polşa Kiyevə ən böyük dəstək verən ölkələrdən biri olub. Onun sözlərinə görə, Varşava yalnız özü yardım göstərməyib, həm də beynəlxalq ictimaiyyətin Ukraynaya dəstəyinin təşkilində mühüm rol oynayıb.
News365.az-ın məlumatına görə, Polşalı siyasətçi hesab edir ki, göstərilən siyasi və hərbi dəstək Ukrayna hakimiyyətinin mövqeyinin qorunmasında əhəmiyyətli rol oynayıb.
Bununla yanaşı, Çarnek son dövrlərdə Kiyev və Varşava arasında yaranan fikir ayrılıqlarına diqqət çəkərək Zelenskinin Polşaya münasibətindən narazılığını ifadə edib.
Onun fikrincə, Ukrayna rəhbərliyinin bəzi addımları iki ölkə arasındakı strateji tərəfdaşlıq ruhuna uyğun deyil və bu yanaşma ilk növbədə Ukraynanın öz maraqlarına zərbə vurur.
Siyasətçi vurğulayıb ki, Polşa-Ukrayna münasibətlərində yaranan gərginliyin aradan qaldırılması üçün Kiyev Varşavanın rolunu və indiyədək göstərdiyi dəstəyi nəzərə almalıdır.
Çarnekin açıqlamaları Polşa ilə Ukrayna arasında son aylarda tarix, kənd təsərrüfatı məhsullarının ixracı və digər siyasi məsələlər ətrafında yaranan müzakirələrin fonunda səsləndirilib.
News365.az
