Ukrayna Prezidenti Volodimir Zelenski bildirib ki, çərşənbə günü səhər saatlarında Ukrayna qüvvələri Rusiyanın Sankt-Peterburq şəhərində yerləşən neft terminalına və digər hərbi obyektlərə zərbələr endirib.
Zelenskinin sözlərinə görə, hücum zamanı Sankt-Peterburq Neft Terminalı, eləcə də Kronştadt hərbi bazasında yerləşən hərbi hədəflər vurulub. O qeyd edib ki, hədəflər Ukrayna ərazisindən təxminən 1100 kilometr məsafədə yerləşir.
Hücum Rusiya Prezidenti Vladimir Putinin ölkənin iqtisadi gücünü nümayiş etdirmək məqsədi daşıyan Sankt-Peterburq Beynəlxalq İqtisadi Forumunun açılışı ərəfəsində baş verib. Forumda Rusiya rəsmiləri, Körfəz ölkələrinin nümayəndələri və müxtəlif dövlətlərdən iş adamlarının iştirakı gözlənilir.
Məlumata görə, əməliyyat Ukrayna Təhlükəsizlik Xidməti, Pilotsuz Sistemlər Qüvvələri, Xüsusi Əməliyyat Qüvvələri, Ukrayna Müdafiə Kəşfiyyatı və Dövlət Sərhəd Xidməti tərəfindən birgə həyata keçirilib.
Sankt-Peterburq meri Aleksandr Beqlov şəhərin Kronştadt, Kirovski və Krasnoselski rayonlarında pilotsuz uçuş aparatları ilə hücum həyata keçirildiyini təsdiqləyib. O bildirib ki, bir neçə obyekt zədələnib, bəzi şəxslər yaralanıb, lakin ölən yoxdur.
Rusiya rəsmiləri neft terminalının vurulduğunu rəsmi şəkildə təsdiqləməsələr də, yerli mənbələr partlayışların terminalın yerləşdiyi liman ərazisində baş verdiyini bildiriblər.
Zelenski daha əvvəl açıqlamışdı ki, Ukraynanın uzaqmənzilli zərbələri nəticəsində Rusiyanın neft emalı gücünün təxminən 40 faizi fəaliyyətini dayandırıb.
