"Gürcüstanın sabiq prezidenti hesab edir ki, Ermənistan ətrafında mümkün hadisələr region üçün yeni təhlükələr yarada bilər..."
Gürcüstanın keçmiş prezidenti Mixail Saakaşvili Ermənistan ətrafında baş verən proseslərlə bağlı narahatedici proqnozla çıxış edib.
Moderator.az xəbər verir ki, bu barədə o, "QORDON" saytındakı bloqunda yazıb.
Saakaşvili Rusiyanın planlarından danışıb
Saakaşvilinin fikrincə, Ermənistanın baş naziri Nikol Paşinyan qarşıdakı seçkilərdə qalib gəlsə, Kreml regionda alternativ ssenarini işə sala bilər. O bildirib ki, Rusiya son dövrlərdə regionda mövqelərini qorumaq üçün müxtəlif vasitələrdən istifadə edir.
Onun sözlərinə görə, Moskvanın Ermənistana təzyiqi təkcə bu ölkə üçün deyil, Gürcüstan üçün də ciddi risklər yaradır. Keçmiş prezident qeyd edib ki, Rusiya əvvəllər Qazaxıstan neftinin öz ərazisi vasitəsilə Avropaya nəqlinə məhdudiyyətlər tətbiq edib və Novorossiysk limanındakı imkanları da məhdudlaşdıra bilər.
Bu halda, İran marşrutu dəyişməzsə, əsas alternativ nəqliyyat dəhlizlərindən biri Gürcüstan olacaq. Saakaşvilinin fikrincə, Moskvanın Ermənistana qoşun yeritmək barədə səsləndirdiyi siqnallar regionda vəziyyəti daha da mürəkkəbləşdirir.
Gürcüstan üçün təhlükəli ssenari
Keçmiş prezident hesab edir ki, Rusiyanın belə bir addım atacağı təqdirdə bunun üçün Gürcüstan ərazisindən istifadə etməyə çalışacaq. Onun sözlərinə görə, hakimiyyət illəri ərzində Bidzina İvanişvilinin siyasəti ölkənin müdafiə imkanlarını zəiflədib və bu, Gürcüstanı daha həssas vəziyyətə salıb.
Saakaşvili iddia edir ki, Moskva üçün böyük geosiyasi oyunlarda əvvəlki xidmətlərin və ya siyasi loyallığın əhəmiyyəti yoxdur. O hesab edir ki, Kreml öz məqsədlərinə çatmaq üçün vəziyyətdən maksimum istifadə etməyə çalışacaq.
Keçmiş prezident xatırladıb ki, 2007-ci ildə növbədənkənar seçkilər keçirməklə Rusiyanın Gürcüstanla bağlı planlarını pozduğunu düşünür və indi də Ermənistanda oxşar proseslərin baş verə biləcəyini istisna etmir.
Ümid Ukraynanın müqavimətinə bağlanır
Saakaşvilinin proqnozuna görə, yaxın dövrdə Ermənistanda daxili gərginlik yarana bilər. O hesab edir ki, Azərbaycan Rusiya qoşunlarının öz ərazisindən keçməsinə imkan verməyəcək və bu halda Moskva Gürcüstan marşrutuna üstünlük verə bilər.
Keçmiş prezidentin fikrincə, belə bir ssenari baş verərsə, nəticədə həm Ermənistan, həm də Gürcüstan üçün ciddi təhlükələr yarana bilər. Buna görə də o, region ölkələrinin təhlükəsizliyinin Ukraynanın müqavimətindən və Rusiyanın hərbi imkanlarının zəifləməsindən asılı olduğunu düşünür.
Saakaşvili vurğulayıb ki, bu proqnozun reallaşmasını istəmir. Onun sözlərinə görə, hadisələrin bu istiqamətdə inkişaf etməsinin qarşısını ala biləcək əsas amil Ukraynanın müqavimətini davam etdirməsi və Rusiyanın hərbi potensialının daha da zəifləməsidir.
