Türkiyənin reytinqli seriallarından biri olsan "Hercai"də "Keriman" obrazı ilə tanınan aktrisa Eylem Tanrıver keçirdiyi plastik əməliyyat nəticəsində ciddi sağlamlıq problemi ilə üzləşib.
Lent.az Türkiyə mediasına istinadən xəbər verir ki, əməliyyat sonrası yaranan səhlənkarlıq səbəbilə qismən iflic olan Tanrıver, məsələ ilə bağlı hüquqi araşdırmalar tələb edib.
Məlumata görə, Eylem Tanrıver, özünü daha yaxşı hiss etmək və görünüşünü yeniləmək məqsədilə plastik əməliyyata müraciət edib. Lakin əməliyyat sonrası saatlarla yanlış pozisiyada saxlanılması nəticəsində sinir zədəsi yaranıb. Əməliyyata deyə-gülə girən aktrisa, müdaxilə sonrası qismən iflic olub.
Yaşadığı sağlamlıq problemi səbəbilə uzun müddətdir ekranlardan uzaq qalan Tanrıver, yaşadığı çətinlikləri ictimaiyyətlə bölüşüb: "6 saatdan artıq bir müddət ərzində, bir əməliyyat pozisiyasında olmaq məcburiyyətində qaldım. Mənə ambulans belə təmin edilmədən, yaralı və zədələnmiş qollarımla öz gücümlə evə getmək məcburiyyətində oldum. Peşəmə də bu səbəbdən davam edə bilmədim. Xəstəxana rəhbərliyi də dəstək vermədi. Övladımın ehtiyacları belə qarşılanmadı. İmtahanında yanında ola bilmədim. Həyatımdan oğurlandı". Tanrıver, bu hadisə ilə bağlı hüquqi prosesə başladığını bildirib.
