Yerli gömrük idarəsinin məlumatına görə, Sincan-Uyğur Muxtar Rayonu (SUMR) ilə Mərkəzi Asiya ölkələri arasında ticarət-iqtisadi əlaqələr dərinləşməkdə davam edir.
Hafta.az-ın yazdığına görə, gömrük idarəsinin məlumatında deyilir ki, bu ilin ilk beş ayında SUMR ilə beş Mərkəzi Asiya ölkəsi arasında xarici ticarətin həcmi 100 milyard yuanı keçib. Bu da Çinlə Mərkəzi Asiya ölkələri arasında xarici ticarətin ümumi həcminin 39,4 faizini təşkil edib.
O cümlədən, 2025-ci ilin yanvar-may aylarında SUMR-dan beş Mərkəzi Asiya ölkəsinə kənd təsərrüfatı məhsullarının ixracının həcmi 4,47 milyard yuan təşkil edib ki, bu da əvvəlki ildən 100,1 faiz çoxdur. Artan kənd təsərrüfatı məhsullarına qurudulmuş və təzə meyvələr, qoz-fındıq, taxıl, tərəvəz, yeməli göbələklər, alkoqollu və alkoqolsuz içkilər daxildir.
Son illər Sincan-Uyğur Muxtar Rayonundakı nəzarət-buraxılış məntəqələri Mərkəzi Asiya ölkələri ilə ticarət və iqtisadi əlaqələri davamlı olaraq dərinləşdirib. Məsələn, Sincan-Uyğur Muxtar Rayonunda yerləşən Karasu keçid məntəqəsi Çin - Tacikistan sərhədində yeganə quru keçid məntəqəsidir. Son illər bu, iki ölkə arasında mübadilə və əməkdaşlıq üçün mühüm pəncərəyə çevrilib.
Məlumatlara görə, 2025-ci ilin yanvar-may aylarında Karasu keçid məntəqəsindən Çinə daxil olan və çıxan insanların, eləcə də nəqliyyat vasitələrinin sayında nəzərəçarpacaq artım olub. O cümlədən, hesabat dövründə Karasu keçid məntəqəsi vasitəsilə ixrac edilən kommersiya avtomobillərinin sayı 102,4 faiz artaraq 9096 ədəd olub.
Urumçi Gömrük nümayəndəsi Çenq Tao qeyd edib ki, gələcəkdə gömrük orqanları gömrük rəsmiləşdirilməsinin səmərəliliyini artırmaqda davam edəcək və SUMR ilə Mərkəzi Asiya ölkələri arasında ticarət dövriyyəsinin sabit artımını təşviq üçün üstünlüklərdən tam istifadə edəcək.
