ABŞ Federal Ehtiyat Sistemi (FRS) əsas faiz dərəcəsini illik 4,25-4,5 faiz aralığında saxlayıb.
Musavat.com tənzimləyicinin açıqlamasına istinadən xəbər verir ki, qərar FED-in Açıq Bazar Komitəsinin bütün üzvləri tərəfindən yekdilliklə qəbul edilib və əksər analitik və iqtisadçıların gözləntiləri ilə üst-üstə düşüb.
Tənzimləyici qeyd edib ki, xalis ixracdakı dalğalanmalara baxmayaraq, son məlumatlar ABŞ-da iqtisadi fəallığın inamlı templə artmaqda davam etdiyini göstərir. İşsizlik səviyyəsi aşağı olaraq qalır, əmək bazarında vəziyyət sabit, inflyasiya isə bir qədər yüksək olaraq qalır.
Tənzimləyicinin bəyanatında deyilir ki, FED uzunmüddətli perspektivdə ölkədə maksimum məşğulluğa və 2 faiz inflyasiyaya nail olmağı hədəfləyir. ABŞ-ın iqtisadi görünüşü ilə bağlı qeyri-müəyyənlik azalıb, lakin yüksək olaraq qalır.
Gələcəkdə FED daxil olan məlumatların iqtisadi perspektivə təsirini izləməyə davam edəcək və onun məqsədlərinə çatmasına mane ola biləcək risklər yaranarsa, pul siyasətini tənzimləməyə hazır olacaq. FED əmək bazarı, inflyasiya təzyiqləri və inflyasiya gözləntiləri, həmçinin maliyyə və beynəlxalq hadisələrlə bağlı məlumatlar da daxil olmaqla geniş çeşidli məlumatları nəzərə alacaq.
Bugünkü qərarla yanaşı, FED yeni makroproqnozlar təqdim edib. Aydın olur ki, 2025-ci ildə inflyasiyaya dair mart ayında 2,7 faiz gözlənilən inflyasiya proqnozu 3 faizə qaldırılıb. 2026-cı ildə FED inflyasiyanı əvvəlki 2,2 faiz ilə müqayisədə 2,4 faiz səviyyəsində proqnozlaşdırır. 2027-ci il üçün proqnoz da pisləşib – 2 faizdən 2,1 faizə.
2025-ci ildə FED ABŞ-da ÜDM artımının 1,4 faiz (martda 1,7 faiz gözlənilirdi), 2026-cı ildə 1,6 faiz (1,8 faiz), 2027-ci ildə isə 1,8 faiz olacağını gözləyir.
FED-in növbəti faiz iclası iyulun 29-30-a planlaşdırılıb. Əksər iqtisadçılar tənzimləyicinin 2025-ci ildə siyasətini yumşaltmağa başlayacağını gözləyirlər.
Qeyd edək ki, prezident Donald Tramp tez-tez FED rəhbəri Cerom Pauelli tənqid edərək, faizləri əsassız olaraq endirməməkdə suçlayır. O, Pauelli qəzəblə “Cənab çox ləng” adlandırır.
Musavat.com
