İyunun 19-da AMEA-nın Nizami Gəncəvi adına Ədəbiyyat İnstitutunda tanınmış şair, ədəbiyyatşünas alim, Azərbaycan Dövlət Mükafatı laureatı, filologiya elmləri doktoru Qasım Qasımzadəyə həsr olunan “Görkəmli şair, tənqidçi-ədəbiyyatşünas Qasım Qasımzadə zamansızlıqda” adlı elmi sessiya keçirilib.
Əvvəlcə alimin həyat və fəaliyyətini əks etdirən sərgiyə baxış olub, ədibin kitabları nümayiş etdirilib.
Elmi sessiya çərçivəsində “Qasım Qasımzadə. Zamansızlıqda”, “Qasım Qasımzadənin yaradıcılıq yolu”, “Ömrün əbədiləşən illəri” adlı kitabların təqdimatı da olub.
Tədbiri giriş sözü ilə AMEA-nın prezidenti, Ədəbiyyat İnstitutunun direktoru akademik İsa Həbibbəyli açaraq Azərbaycan ədəbiyyatında keçən əsrin 50-ci illər ədəbi nəslinin tanınmış nümayəndəsi olan Qasım Qasımzadəni yaradıcı ziyalı, əsl vətəndaş, görkəmli şair kimi xarakterizə edib, onun zəngin irsi barədə məlumat verib.
Akademik İsa Həbibbəyli Qasım Qasımzadənin bədii yaradıcılığında ideoloji meyillərin azlıq təşkil etdiyini, ədibin poeziyasında ardıcıl, fəal həyat mövqeyi və təbiiliyin aydın seçildiyini bildirib. Qeyd edib ki, Qasım Qasımzadə ədəbi gedişata bir şair, tənqidçi-ədəbiyyatşünas və publisist kimi gəlmiş, böyük tarixi dövrün ən xarakterik cəhətlərini, onun ideya-bədii axtarışlarını öz əsərləri ilə ehtiva etmişdir.
“Qasım Qasımzadə Azərbaycanda XX əsr ictimai lirikasının, vətəndaşlıq və məhəbbət lirikasının görkəmli nümayəndəsidir”, – deyə bildirən AMEA rəhbəri onun həyat həqiqətlərinin inikası, insan duyğularının ifadəsi olan şeirlərinin asanlıqla nəğməyə çevrildiyini söyləyib. Vurğulayıb ki, Qasım Qasımzadə ədəbiyyatda gerçək sözü deməyi bacaran, vətəndaş mövqeli böyük şair olub.
Ədəbiyyat İnstitutunun inkişafında Qasım Qasımzadənin rolunu xüsusi qeyd edən akademik İsa Həbibbəyli şairin yaradıcılıq həyatının ən fəal və məhsuldar dövrünün bu elmi müəssisədə işlədiyi illərə təsadüf etdiyini söyləyib. O, Qasım Qasımzadənin AMEA Nizami Gəncəvi adına Ədəbiyyat İnstitutunun Sovet ədəbiyyatı şöbəsinə rəhbərlik etdiyini, yüksək insani keyfiyyətləri, böyük təşkilatçılıq və idarəçilik bacarığı ilə seçildiyini qeyd edib.
AMEA prezidenti ictimaiyyətə təqdim olunan nəşrlər barədə fikirlərini bölüşərək, əsərlərin Ədəbiyyat İnstitutunda təqdimatının keçirilməsini əlamətdar hadisə kimi dəyərləndirib. O, yeni nəşrlərin ədəbi fəaliyyəti ilə ədəbiyyatşünaslıq elminin inkişafında cəfakeşlik göstərmiş Qasım Qasımzadə irsinə böyük töhfə olduğunu bildirib, müəlliflərə təşəkkür edib.
Elmi sessiyada Əməkdar elm xadimi, filologiya elmləri doktoru, professor Qəzənfər Paşayev “Qasım Qasımzadə haqqında söz” adlı məruzəsini təqdim edib. Məruzəçi Qasım Qasımzadənin yaradıcılığının müxtəlif məqamlarına diqqət çəkərək onun nəcib insani keyfiyyətlərə malik ziyalı olduğunu bildirib, alimlə bağlı xoş xatirələrini bölüşüb.
Tədbirdə, həmçinin filologiya üzrə fəlsəfə doktoru, dosent Qurban Bayramov “Elm təşkilatçısı, ictimai xadim”, filologiya elmləri doktoru Vaqif Yusifli “Qasım Qasımzadənin poeziyası”, filologiya üzrə fəlsəfə doktoru, dosent Safurə Quliyeva “Qasım Qasımzadənin publisistikası” adlı məruzələrlə çıxış ediblər.
Tədbirdə yazıçı, şair Seyran Səxavət, filologiya elmləri doktoru, professor Asif Rüstəmli, filologiya üzrə fəlsəfə doktoru, dosent İlham Məmmədli, M.F.Axundov adına Milli Kitabxananın baş biblioqrafı Mehriban Cəfərova çıxış edərək Qasım Qasımzadənin ömür yolu, şəxsiyyəti və ədəbi yaradıcılığı barədə fikirlərini bölüşüblər.
Çıxışlarda Qasım Qasımzadəyə həsr olunan yeni kitablardan da bəhs olunub. Bildirilib ki, nəşrlərdə Qasım Qasımzadənin ədəbi-ictimai mühitdə bir şair kimi tanındığı yaradıcılığının ilk dövrü şəxsi arxivindəki materiallar və ilk şeir kitabları əsasında təqdim olunub. Şairin bədii yaradıcılığının bənzərsiz ideya-bədii özəllikləri ilə yanaşı, dərin nəzəri tutumu olan ədəbi-tənqidi və elmi əsərləri əhatəli tədqiq edilib. Onun ədəbi-elmi, ictimai-siyasi görüşləri fonunda şairin yüksək mənəviyyatlı vətəndaş portreti yaradılıb.
Sonda şairin oğlu, ADA Universitetinin professoru Nəriman Qasımzadə tədbirin təşkilatçılarına və iştirakçılarına minnətdarlığını bildirib, atası ilə bağlı xatirələrini dilə gətirib.
