Pravda.az saytından verilən məlumata görə, ain.az xəbər verir.
“Mən deyəndə ki, Rusiya rəzil duruma düşüb, bəzi dostlarımız deyirlər, “bu ifadə yerində işlədilmir”. Həqiqətən də, Rusiya rəzil duruma düşüb. Çünki konkret bir ölkənin veb saytlarına girişi kökündən bağlayırlarsa, bu, doğrudan da, rəzillikdir. Hansısa konkret saytla bağlı problem ola bilər və buna qadağa qoymaq mümkündür. Bu, normal yanaşma kimi qəbul edilə bilər, amma ümumilikdə konkret bir ölkənin domen adı ilə bağlı bu cür qərar vermək rəzalətin dibidir”.
Bu sözləri Pravda.az-a açıqlamasında siyasi şərhçi Azər Həsrət deyib.
“Azərbaycan da bunu etsinmi? Düşünmürəm ki, biz ucdantutma “ru” domenindən gələn bütün saytlara qadağa qoymamalıyıq. “Ru” domenində adi ədəbiyyat saytı da ola bilər. Yeri gəlmişkən, Azərbaycanda bəzi adamlar Rusiya domen adlarından istifadə edirlər. Bunlara qadağa qoymaq doğru deyil. Konkret saytlara qadağa qoymaq olar, bu da Azərbaycan qanunvericiliyində nəzərdə tutulub. Zərərli məzmun daşıyan saytlarla bağlı qadağa təcrübəmiz var. Rusiya özünü sonuncu yola qoyubsa, biz də Rusiyanın gününə düşməli deyilik. Biz o səviyyədə deyilik. Yekaterinburqda soydaşlarımızla bağlı törətdikləri əməlləri, vəhşilikləri, qanunu saymamalarını bütün dünya gördü. Azərbaycanda da Rusiya vətəndaşlarının saxlanılması səhnələrini bütün dünya gördü. Nə qədər mədəni, səliqəli şəkildə bu işi icra etdik. Fərqimiz, üstünlüyümüz budur. Buna görə də domen adlarına Rusiya kimi ucdantutma qadağa qoymayaq", - o bildirib.
Qeyd: Rusiyada “az” domenli saytlara giriş məhdudlaşdırılıb. Artıq bir həftədən çoxdur ki, “az” domenli saytlar Rusiya ərazisində açılmır.
Aytəkin Qardaşova
Daha ətraflı məlumat və yeniliklər üçün ain.az saytını izləyin.
