Acarıstan Muxtar Respublikası hökumətinin keçmiş rəhbəri Tornike Rijvadze döş qəfəsindən güllə yarası ilə Saqareco rayonunda (Kaxeti bölgəsi) “Geo Hospitals” klinikasına yerləşdirilib.
Ulusal.az xəbər verir ki, bu barədə Gürcüstan Daxili İşlər Nazirliyi məlumat yayıb.
İstintaq Gürcüstan Cinayət Məcəlləsinin 115-ci “Özünü öldürmə həddinə çatdırma” maddəsi ilə aparılır. Faktla bağlı intensiv istintaq hərəkətləri aparılır.
Daxili İşlər Nazirliyinin məlumatına görə, Rijvadzeyə təcili tibbi yardım göstərilib. “Sputnik-Georgia” xəbər verir ki, həkimlərin sözlərinə görə, onun ağciyəri zədələnib və vəziyyəti stabil, lakin ağır olaraq qalır.
Gürcüstan Dəniz Nəqliyyatı Agentliyinin rəhbəri Aleksi Axvlediani odlu silahların ehtiyatsız saxlanmasına görə təqsirləndirilən şəxs qismində həbs edilib.
“TV Pirveli”nin məlumatına görə, Tornike Rijvadze bir neçə gün idi ki, Aleksi Axvledianinin anasının evində olub. İyulun 7-də gecə saat 02:00 radələrində məhz bu evdən atəş səsləri eşidilib. Hazırda polis hadisə yerinə səfərbər olunub.
“Prime Time” xəbər verir ki, o, intihara cəhd etməzdən əvvəl məktub yazıb. Məktub tibb işçiləri tərəfindən onun paltarında aşkar edilib. Məktubda korrupsiya və “dilerlərin” himayədarlığı ilə bağlı ittihamlar da daxil olmaqla bir neçə məsələyə diqqət yetirilir. Rijvadze hakim partiyanın yaradıcısı Bidzina İvanişviliyə və baş nazir İrakli Kobaxidzeyə ailəsini qorumaq üçün müraciət edir.
Tornike Rijvadze bu il aprelin 4-də Acarıstan hökumətinin başçısı vəzifəsindən istefa verib. O, 2016-cı ilin dekabrından Gürcüstanın Energetikanın İnkişafı Fondunun rəhbəri vəzifəsində çalışıb, eyni zamanda energetika nazirinin müavini vəzifəsini tutub.
2014-2016-cı illərdə Rijvadze Acarıstan hökumətinin İqtisadi Şurasının müşaviri olub.
2013-2017-ci illərdə “Adjaristskali Georgia” (Adjara Waters) şirkətinin hüquq məsləhətçisi, sonra isə şirkətin direktoru olub.
Rijvadzenin 36 yaşı var. Təhsilini Gürcüstanda və xaricdə alıb. 2012-2013-cü illərdə İngiltərə Xarici İşlər Nazirliyinin “Chevening” təqaüdünə layiq görülmüşdü. Daha sonra Beynəlxalq Biznes Hüququ üzrə magistr dərəcəsi alıb.
Ailəlidir, iki övladı var.
