Çin Rusiyanın əsl müttəfiqinə çevrilməyib, lakin onun məğlubiyyətində də maraqlı deyil.
Hafta.az “TSN”-ə istinadla xəbər verir ki, bunu “LIGAnet” nəşrinə müsahibəsində Ukraynanın keçmiş xarici işlər naziri Pavlo Klimkin deyib.
"Çinlilərin bütün siyasəti Rusiyanın qazanmamasına və ya uduzmamasına yönəlib. Amma əsas odur ki, uduzmasın. Bir sözlə, Çin Rusiyanın Ukrayna savaşında nə uduzmasını, nə də udmasını istəyir. Rusiya indi Çin üçün aktivdir. Və mənə elə gəlir ki, ən yaxşı aktivdir", - Klimkin vurğulayıb.
O izah edib ki, Pekin üçün Rusiya anti-Qərb, xüsusən də Çin nöqteyi-nəzərindən Moskvanın ritorikasından fərqli çalarları olan anti-Amerika strategiyasının həyata keçirilməsində mühüm rol oynayır.
Bununla yanaşı, diplomat əmindir ki, ölkələr arasında tərəfdaşlıqdan tam hüquqlu müttəfiqliyə keçid baş tutmayıb.
"Mənim cavabım yox. Qətiyyən yox. Çinlilərin öz daxili məhdudiyyətləri var, o cümlədən etibar məsələləri", - o, qeyd edib.
Klimkinin fikrincə, Çin Rusiyanı nə çox güclü olmağa, nə də tamamilə zəifləməyə imkan verməyərək, sabit, idarə olunan dövlət kimi saxlamağa çalışır.
"Çinlilərə güclü Rusiya və zəif Rusiya lazım deyil. Onlar onu balanslaşdıracaqlar", - o, yekunlaşdırıb.
Xatırladılır ki, ötən həftə Honq-Konqun “South China Morning Post” (SCMP) qəzetində Çinin Rusiyanın Ukraynada uduzmasına niyə imkan verə bilməməsi ilə bağlı geniş məqalə dərc olunmuşdu.
