“Əbu-Dabidə Azərbaycanla Ermənistan arasında keçirilən birbaşa danışıqlar yüksək əhəmiyyətə malikdir. Bu görüşün Azərbaycan-Ermənistan münasibətlərində doğrudan da ciddi dönüş yaradacağına inanıram. Beş saatdan çox görüş keçirilib. Təbii ki, Birləşmiş Ərəb Əmirlikləri bu məsələdə neytral mövqedədir. Bunun üçün Əbu-Dabi platformasının seçilməsi başadüşüləndir. Əlbəttə, digər platformalarda aparılan danışıqların subyektləri narahatlıq keçirirlər. Bunların içində Moskva, Brüssel, Vaşinqton da var. Amma mən deyərdim ki, bu regionda yerləşdiyinə, tarixən Azərbaycan və Ermənistanla eyni coğrafiyada yerləşərək daha isti münasibətlərə malik olduğuna görə Moskva daha çox narahatdır. Çünki Qarabağ məsələsində həmişə öz öncüllüyünü, avanqard rolunu saxlamağa çalışmışdı. Qarabağ münaqişəsi bitəndən sonra Azərbaycan və Ermənistan arasında sülh müqaviləsinin bağlanmasını da öz üzərinə götürmək istəyir. Bu məsələdə yenə kartları əlində saxlamağa meyillənir. Buna görə də Azərbaycan və Ermənistan tərəflərini yenidən danışıqlar üçün Moskvaya, Soçiyə, yaxud başqa bir şəhərə gətirməyə çalışacaq. Bu işə ölkələri vadar etmək üçün hər hansı təxribatlar, məcburetmələr və digər addımlar atıla biləcəyini də istisna etmirəm”.
Bu sözləri Pravda.az-a açıqlamasında Azərbaycan-Rusiya parlamentlərarası əlaqələr üzrə işçi qrupunun üzvü Razi Nurullayev deyib.
Deputat bildirib ki, Ermənistan zəif bənd olaraq qalır: “Azərbaycan isə qətiyyətli mövqeyini artıq ortaya qoyub. Vaşinqton platformasından Azərbaycan buna görə çəkildi ki, ABŞ-nin əvvəlki Administrasiyası bir çox məsələlərdə hərbi yardımdan tutmuş humanitar yardıma qədər bütün platformalarda Ermənistana kömək etməyə çalışırdı. Vaşinqton birtərəfli idi və neytrallığını qorumurdu. Brüssel də eynilə Vaşinqton kimi hərəkət edirdi. Birmənalı olaraq Ermənistanı müdafiə etməyə çalışırdılar. Azərbaycanı kompromislərə vadar etmək istəyirdilər və proses də uzanırdı. Buna görə Azərbaycan Brüssel platformasından da imtina etdi. Moskvada isə məsələlər uzadılırdı. Nə o yanlıq, nə bu yanlıq idi, proseslər uzansın və Azərbaycan-Ermənistan daima Moskvanın kandarlarında qalsınlar. Bu cür yanaşmalar heç bir tərəfi qane edə bilməzdi. Məhz Əbu-Dabi platforması buna görə normaldır. Başqa platformalar da ola bilər. Birbaşa danışıqlar daha vacibdir. Vasitəçilər danışıqları pozurlar və öz şərtlərini, milli maraqlarını da ora daxil edirlər, problem yaradır, Azərbaycan və Ermənistan arasında birbaşa danışıqlara maneə törədirlər. Çünki birbaşa danışıqlarda daha yaxın dil tapıla bilər, kənar vasitəçiyə də ehtiyac qalmaz. Bu gün kənar vasitəçiyə ehtiyac yoxdur”.
Aytəkin Qardaşova
