"Moody's Ratings" (Moody's) Azərbaycan Dövlət Neft Şirkətinin reytinqini investisiya səviyyəsinə qədər yüksəldib. Agentlik eyni zamanda SOCAR-a "Baa3" emitent reytinqi verərək, öncəki Ba1 sinfindən olan korporativ reytinqi, həmçinin Ba1-PD defolt ehtimalı reytinqini ləğv edib.
Bu barədə Day.Az xəbər verir.
Kredit qabiliyyətinin qiymətləndirilməsi (BCA) ba2 səviyyəsində təsdiqlənib. Proqnoz müsbətdən sabitə dəyişdirilib.
"Suveren reytinqin artırılması institusional səmərəliliyin yüksəlməsi ilə bağlıdır. Bu, son şoklar və neft qiymətlərindəki dəyişkənlik fonunda makroiqtisadi sabitliyin uzunmüddətli qorunması ilə təsdiqlənir. Tənzimləyici sahədə davam edən islahatlar bank sektorunun sabitliyini gücləndirib, büdcənin karbohidrogen gəlirlərindən asılılığının azaldılmasına sadiqliyin qorunması isə fiskal dayanıqlılığı artırıb. Azərbaycan iqtisadiyyatın şaxələndirilməsi sahəsində də irəliləyişə nail olub ki, bu da nəqliyyat sektorunun sürətli inkişafı ilə bağlıdır. Nəticədə SOCAR üçün əməliyyat və makroiqtisadi mühit yaxşılaşıb, dövlətin şirkəti dəstəkləmək qabiliyyəti artıb və bu, SOCAR üçün kredit baxımından müsbət amildir", - deyə reytinq agentliyinin məlumatında bildirilir.
"Moody's"in düzəliş edilmiş məlumatına əsasən, SOCAR-ın EBITDA marjası 2023-cü ildə 9,1%, 2024-cü ildə isə 10,1% təşkil edib. Müqayisə üçün, bu göstərici 2022-ci ildə 11,8%, 2021-ci ildə 8,7%, 2020-ci ildə isə 6,2% olub. Şirkət ardıcıl dördüncü ildir ki, sabit əməliyyat pul axını, orta səviyyəli kapital xərcləri və məhdud dividendlərlə müsbət azad pul axını (FCF) generasiya edib. SOCAR-ın gəlirliliyi və pul axınının 2025-2026-cı illərdə də sabit qalacağı gözlənilir.
Reytinq agentliyinin qiymətləndirməsi eyni zamanda SOCAR-ın dayanıqlıq kredit göstəricilərinin olduğundan xəbər verir
Şirkətin ümumi borc yükü (gross leverage) 2022-ci ildəki 1,5x göstəricisindən 2023-cü ildə 2,4x-ə, 2024-cü ildə isə 2,9x-ə yüksəlib. Lakin bu göstərici 2021-ci ildəki 3,4x və 2018-2020-cü illərdəki orta 5,2x səviyyəsindən aşağıdır. 2024-cü ildə borc yükünün artması, "Southern Gas Corridor" CJSC (SGC, Baa3 reytinq, müsbət proqnoz) şirkətinin konsolidasiyası ilə bağlıdır. Belə ki, həmin ilin maliyyə hesabatına SGC-nin bütün borcu və demək olar ki, bütün gəliri daxil edilib.
Proqnoza görə, neftin bir bareli üçün 2025-ci ildə 67 ABŞ dolları, 2026-cı ildə isə 65 dollar qiymət götürülməklə, növbəti 18 ay ərzində ümumi borc yükü 3,0x-dən aşağı səviyyədə qalacaq. Azad pul axınının (RCF) xalis borca nisbəti 2025-2026-cı illərdə təxminən 30% səviyyəsində qalacaq ki, bu da əvvəlki göstəricilərdən aşağıdır. Bununla yanaşı, balans hesabatında borcun kapitala nisbəti tədricən yaxşılaşacaq - 2026-cı ildə təxminən 25% təşkil edəcək. Müqayisə üçün, bu göstərici 2022-2024-cü illərdə 35%, 2019-2021-ci illərdə isə 40%-dən çox olub.
2024-cü ilin sonuna olan məlumata görə, nağd pul və depozitlər üzrə balans 13,1 milyard manat təşkil edib. 2025-2026-cı illərdə təxmin edilən pul axını 2,3 milyard manat, 2025-ci ildə cəlb olunacaq yeni borc isə təqribən 5,9 milyard manat olacaq. Bu vəsait 15 milyard manat həcmində borcun ödənilməsi və 2,2 milyard manatlıq birləşmə və satınalma əməliyyatlarını qarşılamalıdır.
Bununla yanaşı, 2024-cü ildə karbohidrogen hasilatında bir qədər sabitləşmə müşahidə olunsa da, SOCAR üzrə neft hasilatı 3,8%, qaz hasilatı isə 8,3% azalıb ki, bu da müəyyən narahatlıq doğurur.
Şirkət bu azalmanı əməliyyat göstəricilərində təbii, qısamüddətli dəyişkənlik kimi qiymətləndirir və orta və uzunmüddətli perspektivdə hasilat səviyyəsinin sabit qalacağını gözləyir. Hasilatı dəstəkləmək məqsədilə SOCAR beynəlxalq upstream (hasilat mərhələsi) genişlənməsinə başlayıb ki, bunu da 2024-cü ildə "Abu Dhabi National Oil Company" (ADNOC) şirkətindən Umm Lulu və Satah Al Razboot adlı dəniz neft konsessiyalarında 3%-lik pay, 2025-ci ildə isə İsrailin Tamar dəniz qaz yatağında 10%-lik pay alması təsdiqləyir.
