"Trampın siyasəti bir şoudur, amma bu, real müharibədir, insanlar ölür, Tramp isə dramatik effektlər axtarır..."
ABŞ prezidenti Donald Tramp Rusiyaya 50 gün vaxt verdiyini deyib: əgər Rusiya bu müddətdə Ukrayna ilə sülhə getməsə, guya, sanksiyalarla üzləşəcək.
Moderator.az xəbər verir ki, amerikalı politoloq və yazıçı, SSRİ-nin sabiq lideri Nikita Xruşşovun nəticəsi Nina Xruşşova "Deutsche Welle" nəşrinə müsahibəsində Trampın bu çağırışını və ümumilikdə Ukrayna ilə bağlı mövqeyini izah edir.
Tramp Putinə niyə incikdir?
Trampın ritorikasında belə bir dəyişiklik niyə baş verib? Xruşşovanın fikrincə, burada şəxsi səbəblər üstünlük təşkil edir. "Tramp Putinə incikdir, çünki Putin ona kifayət qədər diqqət ayırmır. Tramp başa düşüb ki, Zelenski kimi insanlar onu tərifləyir, onu dağın zirvəsi, sülh adamı adlandırır. Amma Putin heç vaxt belə şeylər demir. Tramp Putindən belə bir şey - onun şəxsiyyətinə, böyüklüyünə pərəstiş etməsini gözləyib. O, bunu görməyəndə inciyib".
Trampın Nobel arzusu
Xruşşova hesab edir ki, Tramp indi də Nobel Sülh Mükafatına can atır. Bu səbəbdən də o, müharibəni dayandırmaq təşəbbüsü göstərir: "Tramp düşünür ki, gəlin hər şeyə son qoyaq, birlikdə qalib olaq. Qərb də məğlub olmasın, Rusiya da. Yəni bu, Trampın 2018-ci ildə Şimali Koreya lideri Kim Çen In ilə etdiyi kimi bir görüntüdür. Hər şey razılaşdırılır, sonra isə Tramp deyir: "Mən qalibəm!" Nobel də buna görə mənə verilməlidir. Bu, ona həqiqətən lazımdır".
Ukrayna müharibəsi Baydenin problemi kimi
Nina Xruşşovanın sözlərinə görə, Tramp bu müharibəyə öz müharibəsi kimi baxmır. Əksinə, bu onun üçün Baydenin problemidir: "Avropa bütün yükü öz üzərinə götürüb. ABŞ kömək edir, amma əsas yük Avropanın çiyinlərindədir. Bu səbəbdən Tramp bu vəziyyətdən çıxış yolu kimi istifadə edir. Deyir ki, mən sizə kömək edəcəyəm, amma biz ABŞ-da qalib olmalıyıq. Bu mənim müharibəm deyil. Bu, Baydenin müharibəsidir".
"Tramp Putinin yerində olsaydı, eyni cür davranardı"
Putin Trampın gözündə avtokrat deyil. Tramp özünü də az qala avtokrat hesab edir: "Əgər Tramp Putinin yerində olsaydı, eyni cür davranardı. Onlar gücə inanır. Zərbə alan tərəf zərbə ilə cavab verməlidir. Putinin qərarı Tramp üçün o qədər də ağlasığmaz deyil". Trampın 50 günlük ultimatumu konkret strategiya deyil, şou elementidir: "Trampın siyasəti televiziya şousuna bənzəyir. Bu gün 50 gündür, sabah 150 ola bilər. Hər şey onun gündəminə bağlıdır".
"Trampın əxlaqi sərhədləri yoxdur..."
Trampın Zelenski ilə olan münasibətləri də dəyişib. Ukrayna lideri onu tərifləsə də, Tramp ona belə suallar verib: "Niyə Moskvanı vurursunuz? Onlar sizə nə ediblər ki?" Bu, Trampın riyakarlığından xəbər verir. Əgər Putin Trampa qarşı nəsə desə, Tramp Kremlə atılan bombaları seyr edəcək və bundan zövq alacaq: "Əgər Putin Trampa "Mən səninlə danışmaq istəmirəm" desə və ya onu təhqir etsə, Tramp Kreml yandıqca buna baxacaq və "əla oldu" deyəcək".
Moskva Trampdan nə gözləyir?
Moskva Trampdan nəsə gözləməməlidir. Xruşşova deyir ki, Rusiya elitası artıq başa düşür: Tramp heç kimin tərəfində deyil. Onun tək marağı özününküdür. "Tramp nə Rusiya, nə də Ukrayna tərəfindədir. O, Tramp tərəfdarıdır. Putin onu təhqir etsə, o, Putinə qarşı çıxacaq. Ukrayna onu təhqir etsə, Ukraynaya qarşı olacaq. Tramp realiti-şou qəhrəmanıdır. Bu gün dostsan, sabah düşmən".
"Bu real müharibədir, televiziya şousu deyil"
Xruşşova müsahibəsini belə bitirir: "Trampın siyasəti bir şoudur. Amma bu, real müharibədir. İnsanlar ölür, Tramp isə sadəcə dramatik effektlər axtarır. Biz hələ də onun nə demək istədiyini müzakirə edirik - bu, dəhşətlidir".
