Yaponiyanın nəhəng investisiya holdinqi SoftBank Group, ABŞ-ın aparıcı yarımkeçirici istehsalçısı Intel-ə 2 milyard dollarlıq sərmayə yatırmağı nəzərdə tutan müqavilə imzalayıb.
Marja.az-ın məlumatına görə, şŞirkətlərin yaydığı birgə açıqlamada bildirilir ki, SoftBank Intel-in adi səhmlərini hər səhm üçün 23 dollardan alacaq.
Açıqlamada qeyd olunub ki, SoftBank-ın Intel-ə yatırımı rəqəmsal transformasiya, bulud texnologiyaları və yeni nəsil infrastrukturu dəstəkləyən qabaqcıl texnologiyalara çıxışı sürətləndirərək, süni intellekt inqilabını mümkün etmək istiqamətində şirkətin uzunmüddətli vizyonuna əsaslanır.
SoftBank Group-un baş icraçı direktoru (CEO) Masayoshi Son açıqlamasında bildirib:
"Bu strateji sərmayə ABŞ-da qabaqcıl yarımkeçirici istehsalının və təchizatının daha da genişlənəcəyinə olan inamımızı əks etdirir. Biz inanırıq ki, bu prosesdə Intel kritik rol oynayacaq."
Intel-in baş icraçı direktoru (CEO) Lip-Bu Tan isə qeyd edib ki, sürətlə inkişaf edən texnologiya və innovasiya sahələrində öncül olan SoftBank ilə əməkdaşlığı dərinləşdirməkdən məmnundurlar:
"SoftBank ilə ortaq vizyonumuz ABŞ-da texnologiya və istehsal liderliyini daha da gücləndirməyə yönəlib."
