Dövlət və hökumət başçıları, o cümlədən 20-dən çox ölkənin və 10 beynəlxalq təşkilatın rəhbərləri Tyanjin şəhərində keçiriləcək ŞƏT sammitində iştirak edəcəklər.
Operativ Media xəbər verir ki, bu barədə ÇXR Xarici İşlər Nazirliyi rəhbərinin köməkçisi Liu Bin mətbuat konfransında məlumat verib.
“Çin Xalq Respublikasının Sədri Si Cinpin Xarici ölkələrin 20-dən çox dövlət başçısı və 10 beynəlxalq təşkilatın rəhbəri ilə Hayxe çayı sahilində görüşəcək, ŞƏT-in fəaliyyətinin uğurlu təcrübəsini ümumiləşdirəcək, onun inkişafına və struktur islahatlarına təkan verəcək, iştirakçıları əməkdaşlıq və birgə fəaliyyət üçün birləşdirəcək”, – deyə diplomat vurğulayıb.
O dəqiqləşdirib ki, sammitə Rusiya Prezidenti Vladimir Putin, Belarus Prezidenti Aleksandr Lukaşenko, Hindistanın Baş naziri Narendra Modi, İran Prezidenti Məsud Pəzişkiyan, Qazaxıstan Prezidenti Kasım-Jomart Tokayev, Qırğızıstan Prezidenti Sadır Japarov, Pakistan Prezidenti Şahbaz Şərif, Tacikistan Prezidenti Emoməli Rəhmon, Özbəkistan Prezidenti Şavkat Mirziyoyev, Monqolustan Prezidenti Uxnagiin Xurelsux, Azərbaycan Prezidenti İlham Əliyev, Ermənistanın Baş naziri Nikol Paşinyan, Kambocanın Baş naziri Hun Manet, Maldiv adalarının Prezidenti Məhəmməd Muizzu, Nepalin Baş naziri Şarma Oli, Türkiyə Prezidenti Rəcəb Tayyib Ərdoğan, Misirin Baş naziri Mustafa Madbuli, Türkmənistan Prezidenti Serdar Berdiməhəmmədov, İndoneziya Prezidenti Prabovo Subianto, Laos Prezidenti Thonqlun Sisolith, Malayziyanın Baş naziri Anvar İbrahim və Vyetnamın Baş naziri Fam Minh Çin gələcək.
Tədbirə həmçinin BMT-nin Baş katibi Antoniu Quterreş daxil olmaqla beynəlxalq təşkilatların və çoxtərəfli mexanizmlərin rəhbərləri də dəvət olunub.
ŞƏT sammiti Çinin şimalında yerləşən Tyanjin şəhərində 31 avqust – 1 sentyabr tarixlərində keçiriləcək.
