ABŞ prezidenti Donald Tramp “Todd Starnes Show” radioproqramında deyib ki, Ukraynadakı hərbi münaqişənin həllində irəliləyişin mümkün olub-olmadığı yaxın iki həftə ərzində bilinəcək.
"Mən deyərdim ki, irəliləyişin mümkün olub-olmadığını biz iki həftədən sonra bu və ya digər şəkildə biləcəyik", - Tramp aparıcı Todd Starnes ilə söhbətində deyib.
Modern.az-ın məlumatına görə, dövlət başçısı əlavə edib ki, Rusiya lideri Vladimir Putin göstərilən müddətin sonuna qədər müharibəni dayandırmasa, Vaşinqton çox güman ki, “taktikanı dəyişməli olacaq”.
Tramp Ukrayna prezidenti Vladimir Zelenski ilə avqustun 18-də Ağ Evdə baş tutan görüşü də şərh edib. Onun sözlərinə görə, Ukrayna lideri “çox yaxşı” görünürdü və mübarizədə qətiyyət nümayiş etdirir.
"O, gərgin mübarizə aparır. Bu, çətin müharibədir", - ABŞ prezidenti deyib.
Tramp əvvəllər bir neçə dəfə döyüş əməliyyatlarının dayandırılması üçün müxtəlif müddətlər müəyyənləşdirib. İyulun 14-də o, 50 gündən danışdı, lakin sonradan bu müddəti qısaldaraq, bunu Vaşinqtonun səylərinə baxmayaraq eskalasiyanı davam etdirən Vladimir Putinin hərəkətlərindən məyus olması ilə izah etdi.
İyulun 29-da yeni ultimatum verildi: Tramp Moskvaya 10 gün vaxt verdi, Rusiya və onun ticarət tərəfdaşlarına 100% tariflər tətbiq etməklə hədələdi. Lakin bu müddət bitəndə Trampın xüsusi nümayəndəsi Stiv Vitkoff Moskvaya getdi və orada Ağ Evin məlumatına görə, Vladimir Putin Amerika prezidenti ilə şəxsi görüş istəyib. Görüş avqustun 15-də Alyaskada baş tutub və sonda elan edilmiş sanksiyalar tətbiq olunmayıb. Vaşinqton bunu diplomatik səylər üçün məkanın saxlanmasının zəruriliyi ilə izah edib.
Avqustun 18-də Zelenski və Avropa liderləri ilə danışıqlar zamanı Tramp deyib ki, o, “bir-iki həftə” ərzində nizamlanmanın mümkünlüyünü görür. Tramp Ukraynanı gələcək təcavüzə qarşı təminatla təmin edəcək razılaşmanın əldə olunmasına maneçilik törədən “son dərəcə çətin məsələlərin” olmadığı fikrini bildirib və ABŞ prezidenti bununla bağlı narahatlığı “kobud şəkildə şişirdilmiş” adlandırıb.
Bu danışıqlardan sonra Tramp şəxsən Putinə zəng edərək Zelenski ilə mümkün görüşün təşkilini müzakirə edib. Lakin Rusiyanın xarici işlər naziri Sergey Lavrov tezliklə belə bir görüşün yaxın gələcəkdə mümkün olmadığını açıqlayıb. Kremlin xarici siyasət blokuna yaxın mənbə “The Washington Post”a təsdiqləyib ki, Rusiya prezidenti çətin ki, belə danışıqlara razı olsun.
Avqustun 21-də “The Guardian” ABŞ administrasiyasındakı mənbələrə istinadən yazıb ki, Tramp Vladimir Putin və Vladimir Zelenski arasında ikitərəfli görüşün təşkili cəhdlərini dayandırmaq qərarına gəlib. Nəşrin yazdığına görə, ABŞ prezidenti belə qənaətə gəlib ki, Moskva və Kiyev müstəqil şəkildə üzbəüz danışıqların təşkili təşəbbüsü ilə çıxış etməlidirlər və bu, onun fikrincə, müharibənin dayandırılması istiqamətində növbəti addım ola bilər.
