"Karvan-Yevlax"ın futbolçusu Elvin Yunuszadənin Sport24.az-a müsahibəsi
- Misli Premyer Liqasının II turunda "Kəpəz"i 3:2 hesabı ilə məğlub etdiniz. Oyunla bağlı nə deyə bilərsən?
- Matçın bizim üçün çətin olacağını bilirdik. Gözlədiyimiz kimi də alındı. Rəqibi təhlil etmişdik. Üstün tərəflərini bilirdik. Əsas odur ki, üç xal qazana bildik.
- Oyunun sonlarında əvəzləndin. Durumun necədir?
- Ciddi bir şey yoxdur. Həkim dedi ki, risk etməyək. Davam etsəydim, əzələ dartıla və ya daha ciddi nəsə ola bilərdi. Qarşılaşmanın bitməyinə də 3-4 dəqiqə qalmışdı. Ciddi zədəm yoxdur.
- İki oyuna dörd xal qazanmısınız. Belə nəticə gözləyirdin?
- Bu, pis nəticə deyil. Amma çempionat hələ təzə başlayıb. Bizi uzun marafon gözləyir. Bu, hələ heç bir şey demək deyil. "Kəpəz"lə görüşü yaddan çıxartmalı və növbəti matçlara köklənməliyik.
- Üçüncü turda çempion "Qarabağ"la üz-üzə gələcəksiniz. Bu dəfə hansı nəticəyə ümid edirsiniz?
- Bu oyuna da ciddi hazırlaşacağıq. Bu matç bizim üçün gözəl sınaq olacaq. Yaxşı və çatışmayan tərəflərimizi görəcəyik.
- Xal qazana bilərsiniz?
- Nəticə ilə bağlı nəsə demək çətindir. Bu, futboldur. Nələrin baş verəcəyini bilmək olmur. Heç kim II turda "Sumqayıt"ın "Qarabağ"ı məğlub edəcəyini gözləmirdi.
- İki tura nəzər salsaq, komandanızın cari mövsümdəki hədəflərini necə görürsən?
- Əsas olan odur ki, çempionatda qalmalıyıq. Bunun üçün mübarizə aparmalıyıq.
İdman.biz
