.jpg)
BAKI, 26 avqust. TELEQRAF
2025-ci ilin yanvar–iyun aylarında hava nəqliyyatı ilə yük daşımalarından 1 milyard 108 milyon 646 min manat gəlir əldə olunub. Bu göstərici 2024-cü ilin müvafiq dövrü ilə müqayisədə 13,9% az olub.
Teleqraf Dövlət Statistika Komitəsinin məlumatına əsasən xəbər verir ki, hesabat dövründə ümumilikdə 187,6 min ton yük daşınıb ki, bu da ötən ilin göstəricisinə nisbətən 10,5% azdır. Yüklərin 185,5 min tonu beynəlxalq, 2,1 min tonu isə daxili daşımaların payına düşüb.
Yük dövriyyəsi 1 milyard 534,1 milyon ton-km təşkil edib, ötən ilin göstəricisinə görə 11,9% azalıb.
Sərnişin daşımalarında isə artım müşahidə olunub. Belə ki, 2025-ci ilin ilk altı ayında hava nəqliyyatı ilə 1 milyon 861,1 min sərnişin daşınıb ki, bu da ötən ilin müvafiq dövrü ilə müqayisədə 2,6% çoxdur. Sərnişin dövriyyəsi 5,5% artaraq 3 milyard 747,3 milyon sərnişin-km-ə çatıb.
Sərnişin daşımalarından əldə olunan gəlir isə 869,4 milyon manat təşkil edib və bu, illik müqayisədə 3,4% azdır.
Qeyd edək ki, poçt daşımalarında da ciddi artım qeydə alınıb. Hesabat dövründə hava nəqliyyatı ilə 603,3 ton poçt daşınıb, bu da ötən ilin eyni dövrünə nisbətən 2,3 dəfə çoxdur.
