BAKI, 27 avqust. TELEQRAF
Hindistanda fermer timsahın qurbanı olub.
Teleqraf xəbər verir ki, hadisə Karnataka ştatının Kunçaqanur kəndində baş verib.
38 yaşlı Kaşappa Hanamanta Kambali öküzlərini Krişna çayına apararkən qəflətən yırtıcının hücumuna məruz qalıb. Timsah onu suyun altına çəkib aparıb.
Axtarış əməliyyatı beş saat davam edib, lakin kişini xilas etmək mümkün olmayıb. Cəsəd suda tapılıb. Yerli hakimiyyət orqanları sakinləri yağış mövsümündə çimmənin təhlükəli olduğu barədə xəbərdar edib, çünki bu dövrdə timsahlar çay sistemlərində fəal hərəkət edirlər.
Qeyd edək ki, bu, 2025-ci ildə bölgədə timsahların insanlara ölümlə nəticələnən üçüncü hücumudur. İyul ayında qonşu Bijapur rayonunda timsah 12 yaşlı oğlanı yeyib.
Meşə departamentinin məlumatına görə, Krişna çayında timsahların sayı 200-ü keçir, bu da xəbərdarlıq işarələrinin və hasarların quraşdırılmasını tələb edir. Hakimiyyət orqanları ölənlərin ailələrinə 500 min rupiyə qədər (təxminən 9700 AZN) kompensasiya ödəyir, lakin yerli sakinlər daha effektiv müdafiə tədbirləri tələb edirlər.
