Bakı, 29 avqust, AZƏRTAC
Türkiyə ilə Yaponiyanın Ukrayna və Suriyanın yenidən qurulmasında tərəfdaşlığı bu prosesə böyük təsir göstərə bilər. AZƏRTAC xəbər verir ki, bu fikri Türkiyə Prezidenti Rəcəb Tayyib Ərdoğan “Nikkei Shimbun” qəzeti üçün yazdığı məqalədə ifadə edib.
O qeyd edib: “Qarşıdakı dövrdə şirkətlərimiz Afrika və Mərkəzi Asiyada infrastruktur, enerji, nəqliyyat və digər inkişaf layihələrinin birgə həyata keçirilməsi üçün perspektivli potensiala malik olacaqlar. Üstəlik, bu, sözsüz ki, Ukrayna və Suriyanın yenidən qurulması proseslərində Türkiyə ilə Yaponiya arasında real tərəfdaşlığa dərin təsir göstərə və uzunmüddətli dəyər yarada bilər”.
Türkiyə lideri əlavə edib: “Beynəlxalq sistem ciddi böhranlarla sarsılır, dünya iqtisadiyyatı təlatümlər yaşayır, enerji və ərzaq təhlükəsizliyi getdikcə kövrəkləşir. Bu gün heç bir dövlət qlobal problemləri təkbaşına həll etmək iqtidarında deyil. Birtərəfli təşəbbüslər getdikcə daha çox çıxılmaz vəziyyətə gətirib çıxarır və beynəlxalq institutlar səmərəsiz olduğunu sübut edir. İndi qədim sivilizasiyalara söykənən Türkiyə və Yaponiya qlobal problemlərin konstruktiv həllinə birgə yol aça bilər”.
