ain.az, Yenisabah portalına istinadən məlumat yayır.
Gənclər cəmiyyətin ən dinamik və yaradıcı qüvvəsidir. Onların enerjisi, yenilikçi düşüncəsi, təşəbbüskarlığı sosial-iqtisadi və mədəni inkişafda mühüm rol oynayır.
Cəmiyyətin inkişafında onların iştirakı, ilk növbədə, ictimai və sosial sahədə özünü göstərir, çünki gənclər sosial problemlərin həllində, könüllülük fəaliyyətlərində, qeyri-hökumət təşkilatlarında və müxtəlif sosial layihələrdə fəal iştirak edirlər.
Təhsil və elm sahəsində isə gənclər ölkənin intellektual potensialını artıraraq akademik uğurlar əldə edir, yeni bilik və texnologiyaların inkişafına kömək edirlər. Onlar müxtəlif tədqiqatlarla innovasiyalara imza atır, elmi nailiyyətlər əldə edərək ölkənin beynəlxalq arenada mövqeyini möhkəmləndirirlər. Dominos pizza
Gənclərin iqtisadiyyatda da rolu danılmazdır, çünki onlar startaplar və kiçik bizneslərlə yeni iş yerləri yaradır, rəqəmsal texnologiyalar və süni intellekt kimi sahələrdə inkişafı təmin edirlər. Əmək bazarında peşəkar bilik və bacarıqları ilə önə çıxaraq ölkənin iqtisadi inkişafına mühüm töhfə verirlər.
Gənclərin mədəniyyət və incəsənət sahəsindəki rolu da xüsusi qeyd olunmalıdır. Çünki onlar musiqi, incəsənət və ədəbiyyatda yeni üslublar yaradır, milli irsi qoruyaraq onu beynəlxalq səviyyədə tanıdırlar. Eyni zamanda ekoloji problemlərin həllində onların rolu artmaqdadır. Onlar iqlim dəyişikliyi ilə mübarizədə, yaşıl iqtisadiyyat və alternativ enerji mənbələrinin inkişafında fəal iştirak edirlər.
Mövzu ilə bağlı “Yeni Sabah”a danışan Azərbaycan Gənclər İttifaqının layihələr üzrə koordinatoru Tahirə Allahverdiyeva bildirib ki, gənclər təcrübi fəaliyyətlərə nə qədər tez atılsalar, onlar üçün daha yaxşıdır:
“Azərbaycan Gənclər İttifaqı”nın faəliyyəti daha çox incəsənət yönümlüdür. Biz gəncləri uşaqlıq dövründən gənclik dövrünə qədər istedadlarını ortaya çıxarmaq, səhnə özgüvəninin yaranması və qorxularına qalib gəlmək yönündə dəstəkləyirik.
Eyni zamanda digər gəncləri müsabiqələrin təşkilində cəlb edirik ki, onlar müsabiqə prosesində stress altında fəaliyyət göstərmək, ani kriz anında düzgün reaksiya vermək və digər istiqamətlər üzrə praktiki iştirak etsinlər. Onlar artıq psixoloji olaraq, prosesləri necə idarə etmək olar, onu tam şəkildə öyrənilər.
Bizim fəaliyyətlərimiz bu yöndədir. Əlimizdə çoxlu ideyalar, layihələr var. Hazırda bunların üzərində işləyirik. Biz nəinki öz ölkəmiz daxilində, eyni zamanda 12 fərqli ölkədə Azərbaycan diasporu ilə işlər nəzərdə tutmuşuq ki, həmin ölkələrin vətəndaşı olan gənclərimizin gələcəkdə ölkəmizə gəlməsi, gəzməsi üçün şərait yaratmağı düşünürük.
Gənclərə tövsiyə edirəm ki, təcrübə həyatına daha tez atılsınlar. Çünki bəzən biz nəzəri olaraq çox şey bilirik. Mənim özüm pedaqoqam və müəllim kimi fəaliyyət göstərirəm. Məndə nəzəri biliklər çox yüksək səviyyədə idi, amma gözləyirdim ki, mükəmməlləşim və nə vaxtsa hər şeyi biləndə başlayaram.
Amma bu heç də düzgün fikir deyil. Biz heç vaxt heç nəyi tam və istədiyimiz kimi mükəmməl səviyyədə bilməyəcəyik. Ona görə də, vaxtında təcrübə prosesindən qorxmamaq, çəkinməmək lazımdır. Təcrübə isə iş prosesində yaranır.
Gənclərə deyərdim ki, qorxmasınlar, addım atmaqdan çəkinməsinlər. Səhvlər olacaq və edəcəklər. Amma bu onların inkişafına daha çox təsir göstərəcək”.
Müstəqil Həmkarlar Birliyinin sədr müavini, sosioloq Əhməd Rəhmanov isə qeyd edib ki, gənclərə könüllük əsasında müxtəlif peşələr öyrədilsə, daha yaxşı olar:
“Bu gün bizim gənclərin cəlb olunduğu sosial layihələrin hamısı demək olar ki, humanitar fənlər üzrədir. Amma əslində, həmin o gənclərə könüllük əsasında müxtəlif peşələr öyrədilsə, daha yaxşı olar.
Yəni peşə kursları təşkil edib yaxud müxtəlif zavod və fabriklərdə bir neçə ay iş fəaliyyətinə cəlb etmək daha faydalı və səmərəli olar. Məsələn, sovet dövründə peşə məktəbləri var idi.
Hər bir peşə məktəbində 1-ci kursdan sonra, gəncləri öz peşələri üzrə 1 aylıq kurs keçməyə göndərirdilər. 1 aydan sonra həmin o müssisə baxırdı ki, gənclərdən bir neçəsi aktivdir və nəyisə bacarır. Həmin o müəssisə hətta bu gəncləri yayın axırına qədər müqavilə ilə saxlayıb, əməkhaqqı da verirdi. Bunu tətbiq etmək lazımdır.
Hazırda imtahan nəticələri də onu göstərir ki, gənclərin meyli daha çox humanitar fənlərədir. Bu gün bizim gənc bilməlidir ki, evdə işıq sönəndə, əlinə bir alət alıb öz işini həll edə bilsin. Könüllülük formasında gənclərimizi belə işlərə cəlb etmək lazımdır”.
Nazim Hacıyev
Məqalə Azərbaycan Respublikasının Medianın İnkişafı Agentliyinin maliyyə dəstəyi ilə “İnsan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması” istiqaməti üzrə hazırlanmışdır.
Hadisənin gedişatını izləmək üçün ain.az saytında ən son yeniliklərə baxın.
