Əmək və əhalinin sosial müdafiəsi naziri Anar Əliyev və İsmayıllı Rayon İcra Hakimiyyətinin başçısı Nahid Bağırov özünüməşğulluq proqramı çərçivəsində rayon sakinləri Samirə Səfər qızı Həsənova və Xatirə Arif qızı Talıblı üçün qurulmuş kiçik təsərrüfatlara baxış keçiriblər.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, özünüməşğulluq proqramı üzrə aktivlərlə təmin edilən S.Həsənova qadın gözəllik salonunu yaradaraq bu sahədə kiçik biznesini qurub. X.Talıblı isə proqramın dəstəyi ilə dərzi sexini qurduqdan sonra onu daha da genişləndirib və moda evi yaradıb. Burada nazirliyin tabeliyindəki Dövlət Məşğulluq Agentliyinin Göyçay Peşə Hazırlığı Mərkəzi ilə əməkdaşlıq əsasında dərzilik üzrə peşə kursu da təşkil edilib.
Hər iki proqram iştirakçısı işsiz və işaxtaran şəxslərin kiçik biznesə çıxışına imkan yaradılması, öz təsərrüfatlarını yaratmaq üçün göstərilən dəstəyə görə dövlətimizin başçısına minnətdarlıqlarını ifadə ediblər.
Qeyd edək ki, ötən dövrdə özünüməşğulluq proqramı çərçivəsində İsmayıllı rayonunda 1631 şəxs üçün kiçik təsərrüfatlar qurulub.
Nazirliyin tabeliyindəki Sosial Xidmətlər Agentliyinin sifarişi ilə icra edilən layihə əsasında İsmayıllı rayonunda yaradılmış günərzi qayğı mərkəzinə də baxış olub.
Burada sosial işçi, pedaqoq, psixoloq və digər mütəxəssislər tərəfindən əlilliyi olan və digər həssas qruplara aid uşaqların qavrayış, emosional, fiziki inkişafı, ilkin yazı və oxuma bacarıqlarına yiyələnməsi üçün işlər aparılır.
