İnsanın dünyaya gəlişindən öncə keçirdiyi inkişaf mərhələləri hələ də elm adamları üçün böyük maraq doğurur. Bu mərhələlərdən biri də uşaqların ana bətnində səslərə qarşı necə reaksiya verdikləri ilə bağlıdır. Gündəlik həyatda çox vaxt valideynlər hamilə qadınla danışanda, musiqi dinləyəndə və ya sakitləşdirici sözlər söyləyəndə körpənin də bunu hiss etdiyinə inanır. Bəs, bu inanc elmi faktlarla nə dərəcədə üst-üstə düşür?
Səsləri eşitmək qabiliyyəti nə vaxt başlayır?
Araşdırmalara görə, dölün qulaq strukturları hamiləliyin 18-ci həftəsindən etibarən formalaşmağa başlayır. Təxminən 24-25-ci həftələrdə isə körpə xarici səsləri qəbul edə biləcək səviyyəyə çatır. Bu mərhələdə ilk olaraq ürək döyüntüsü, qan dövranı və ananın həzm səsləri kimi daxili səsləri eşidir. Sonrakı aylarda isə ana danışanda və ya ətraf mühitdə musiqi sədaları eşidiləndə dölün ürək döyüntülərində, hərəkətlərində dəyişiklik müşahidə olunur.
Elm adamlarının müşahidələr
Musiqi təsiri: Aparılan tədqiqatlarda müəyyən olunub ki, klassik musiqi və ya yumşaq melodiyalar uşağın hərəkətlərini sakitləşdirə bilər.
Ana səsi: Döl ən güclü şəkildə ananın səsini tanıyır. Doğulduqdan sonra körpənin anasının səsinə daha tez reaksiya verməsi də bunun sübutudur.
Səs tonları: Yüksək və kəskin səslər uşağı narahat edə, hətta ürək döyüntülərini sürətləndirə bilər.
Ana ilə körpə arasındakı bağ
Mütəxəssislərin fikrincə, uşağın ana bətnində səsə reaksiya verməsi həm də ana ilə körpə arasında emosional bağın güclənməsinə şərait yaradır. Hamiləlik dövründə ana sakitləşdirici sözlər söylədikcə, nağıllar oxuduqca və ya musiqi dinlətdikcə uşaq bu səs mühitinə öyrəşir. Nəticədə, doğulduqdan sonra da bu tanış səslər onu rahatladır.
