Polşanın Baş naziri Donald Tusk bildirib ki, ölkənin hava məkanı son günlərdə 19 dəfə pozulub və bu pozuntuların əksəriyyəti Belarus üzərindən həyata keçirilib.
News24.az xəbər verir ki, Donald Tusk, bu səbəbdən NATO müqaviləsinin dördüncü maddəsinin işə salınmasını tələb etdiklərini açıqlayıb. NATO-nun 4-cü maddəsinə əsasən, əgər alyansın üzv ölkələrindən birinin ərazi bütövlüyü, müstəqilliyi və ya təhlükəsizliyi təhdid altındadırsa, alyans daxilində məsləhətləşmələr aparılır.
Polşa Baş naziri parlamentdə çıxış edərək bildirib ki, ölkə artıq yalnız həmrəylik mesajlarına deyil, həm də müttəfiqlərindən daha geniş dəstəyə ehtiyac duyur. O, Polşanın İkinci Dünya Müharibəsindən sonra ilk dəfə silahlı toqquşmaya bu qədər yaxın olduğunu vurğulayıb.
Tusk əlavə edib ki, Polşa üç hava hücumunu zərərsizləşdirib, dördüncüsü isə vurulmuş ola bilər. O, hazırda ölkənin müharibə vəziyyətində olduğunu söyləməyin lazım olmadığını, lakin vəziyyətin ciddi olduğunu vurğulayıb. NATO üzvlərindən gələn ilkin siqnallar isə vəziyyətin nə qədər ciddi olduğunu təsdiqləyir.
