Bakı, 11 sentyabr, AZƏRTAC
Ebola qızdırmasından zərərçəkən Konqo şəhərlərində əhalinin hərəkətinin məhdudlaşdırılması üçün nəzarət-buraxılış məntəqələri qurulub.
AZƏRTAC “Reuters” agentliyinə istinadla xəbər verir ki, yoluxma hallarının sayı bir qədər artıb və humanitar təşkilatların əməkdaşları cavab tədbirləri üçün kifayət qədər maliyyənin olmadığı barədə xəbərdarlıq ediblər.
Konqo Demokratik Respublikasının Səhiyyə Nazirliyi ötən həftə ölkədə üç ildə ilk dəfə ebola qızdırmasının yayıldığını açıqlayıb. 28 ehtimal edilən yoluxma halı və 15 ölüm faktı qeydə alınıb. Bu, Kasai əyalətində 2008-ci ildən bəri ilk yoluxma halıdır.
Kasai əyalətinin qubernatoru bildirib ki, ilk hadisənin qeydə alındığı Bulape zonası karantindədir, insanların bu zonadan giriş-çıxışının qarşısını almaq üçün bir neçə nəzarət-buraxılış məntəqəsi qurulub.
Ümumdünya Səhiyyə Təşkilatı keçən həftə Konqoda dərman ehtiyatı olduğunu, eləcə də cəbhə bölgəsindəki tibb işçilərini peyvənd etmək üçün Kasaiyə çatdırılacaq 2 min doza ervebo peyvəndi olduğunu bildirib.
