Ukrayna 2026-cı ildə hərbi əməliyyatlar davam edərsə, birbaşa silah tədarükü və PURL proqramı çərçivəsində ABŞ-dan silah alınması üçün ayrılan pullar nəzərə alınmasa, Qərb ölkələrindən təxminən 60 milyard dollar məbləğində maliyyə yardımı almalıdır. Musavat.com xəbər verir ki, məlumat Ukrayna Nazirlər Kabinetinin açıqladığı büdcə sənədlərində əksini tapıb.
Rusiya işğalına qarşı mübarizəni davam etdirmək üçün Ukraynanın xarici yardıma ehtiyacı hər il artır. 2024-cü ildə bu məbləğ 30 milyard dollara yaxın, 2025-ci ildə 46 milyard dollar idi, 2026-cı ildə 60 milyard dollara yüksələcək. Bu ilin əvvəlində Kiyevə cari hesablarda müsbət saldo saxlamaq üçün ayda təxminən 3 milyard dollar, yayda artıq 4 milyard dollar lazım gəlib, ilin sonuna isə bu məbləğ 5 milyard dollara çatacaq. Hökumətin hesablamalarına görə, növbəti il ərzində bu rəqəm dəyişməz qalacaq. Xərclərin çoxu müdafiəyə gedir.
Hərbi texnika və silahların birbaşa tədarükü və ABŞ-dan silah alışı proqramının maliyyələşdirilməsi PURL-də iştirak edən ayrı-ayrı ölkələrin konkret qərarlarından asılıdır. Ukrayna Müdafiə Nazirliyinin son aylardakı məlumatları göstərir ki, söhbət ayda 1-2 milyard dollardan gedir. Əgər bu hesablamalar doğrudursa, onda 2026-cı ildə müttəfiqlərinin Ukraynaya azadlıq müharibəsində dəstək üçün ümumi xərcləri ən azı 75-80 milyard dollar təşkil edə bilər.
Musavat.com
