Cibgirlər fəalları onları təqib etməkdə ittiham edir...
Poliqon Bild nəşrinə istinadən xəbər verir ki, Venetsiyada cib oğruları şəhərin yerli vətəndaş mühafizə qruplarına qarşı məhkəməyə müraciət ediblər. Onların iddiasına görə, fəallar onları videoya çəkir, turistləri xəbərdar edir və polisə qayda pozuntularını bildirirlər.
Bir neçə il əvvəl Venetsiyada yaranmış bu könüllü qruplar şəhərdə artan oğurluq hallarına qarşı fəaliyyət göstərir. Əsasən turistlər hədəf olduğu üçün könüllülər şəhəri patrul edir, “Diqqət, cib oğruları!” qışqırır, pozuntuları kameraya çəkir, şübhəliləri saxlayır və polisə məlumat verir. Yayınlanmış videolardan birində bir fəalın cib oğrusuna qarşı qışqırdığı, qadının isə üzünü çantasının içərisinə gizlətdiyi görünür.
İtaliyada son cinayət hüququ islahatı ilə sadə bir cib oğrusunu saxlamaq indi həmişə mümkün deyil: oğru yalnız zərərçəkənin şikayəti əsasında məsuliyyətə cəlb edilə bilər. Bu hüquqi boşluq cib oğruları tərəfindən fəallara qarşı şikayətlər vermək üçün istifadə olunur.
Polis nümayəndələri müdaxilə etməyin çətin olduğunu təsdiqləyir, çünki vətəndaşların oğruları dayandırması üçün ümumi qaydalar yoxdur
"Təəssüf ki, heç nə edə bilmirik, çünki vətəndaş mühafizəsinin qorunması üçün milli göstərişlər yoxdur. Mən həmişə demişdim ki, vətəndaşlar hüquq-mühafizə orqanlarının yerini tutmamalıdır, nəticəsi budur", deyə polis komandiri Marko Aqostino bildirib.
Vətəndaş mühafizəsində uzun illər fəaliyyət göstərən Monka Poli isə şokdadır.
"Biz oğurluqlar barədə məlumat veririk və tez-tez hücumları önləyirik, amma birdən günahkar vəziyyətinə düşürük. Bu paradoksdur", deyə fəal bildirib.
Venetsiya meri Luiçi Brunyarro vətəndaş mühafizəsini dəstəkləyib:
"Problemin kökü milli qanunun olmamasıdır. İndi gəldiyimiz nöqtə odur ki, cib oğruları vətəndaşlara qarşı şikayət edir. Təhlükəsizlik üçün dərhal müdaxilə etməliyik".
Poliqon.info
