Borc üstündə dava: İşlədiyi kafenin sahibinin oğlunu bıçaqladı
Demokrat.az-ın əldə etdiyi xəbərə görə, hadisə ötən ilin iyulun 28-də rayonun Sarayevo küçəsində baş verib. Göyçay rayon sakini, 2004-cü il təvəllüdlü Tural Valeh adlı şəxs tərəfindən icarəyə götürülmüş “Ləzzət” kafesində işləyərkən yaşadığı rayona getmək üçün onun
oğlu Emindən qısa müddət üçün, yəni 2024-cü ilin iyul ayının əvvəllərində 50 manat əvvəlcədən əmək haqqı olaraq alıb.
Lakin verdiyi sözə əməl etməyərək işə gəlməməsi səbəbindən Emin ilə telefonla danışarkən aralarında mübahisə yaranıb. Buna aydınlıq gətirilməsi üçün vədləşiblər və iyulun 28-də, saat 23:45-də Sarayevo küçəsi, 12 saylı binanın arxasında görüşüblər.
Həmin mövzuda mübahisələrini davam etdirilən zaman Emin Turalın hadisə yerinə gəlmiş əmisi oğlunun qulaq nahiyəsindən yumruqla vurub. Bu zaman Tural özündə olan bıçaqla Eminin dörd dəfə qarın-döş nahiyələrinə zərbə yetirib.
Hadisəni törədən Turalın barəsində Cinayət Məcəlləsinin 126.1-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən təqsirləndirilən şəxs ona elan olunmuş ittiham üzrə özünü təqsirli bilib. O, ifadəsində göstərib ki, Emingilin kafesində günü 15 manata ofisiant işləyib: “Lakin yaşadığım evin kirayə pulunu verə bilmədiyim üçün iş yerimdən 50 manat borc aldım. Növbəti gün rayonda tanışlarımdan vəfat edən oldu. Mən də icazə alaraq rayona getdim. Rayonda olarkən əlimdə stəkanla yıxıldım və əlim kəsildi. Həkim bir müddət işləməməli olduğumu bildirdi. Bu barədə Eminə və orada işləyən inzibatçıya zəng edərək məlumat verdim. Onlara olan borcumu qaytaracağını bildirdim”.
Təqsirləndirilən şəxs qeyd edib ki, həmin vaxtdan 2 gün keçdikdən sonra orada işləyən dostu Türkel zəng vuraraq Emingilin pullarını istədiklərini bildirib: “Mən də Türkelə dedim ki, onlarla özüm danışacam. Daha sonra Eminin əmisi oğlu zəng etdi və pulu tələb etdi. Mən də pulu Emindən aldığımı və ancaq onunla danışacağımı söylədim. Sonra Eminə zəng edərək pulu göndərmək üçün kartını atmasını istədim. Emin məndən nə vaxt işə gələcəyimi soruşdu. Mən daha onlarla işləmək istəmədiyimi bildirdim. Bunu dedikdən sonra Emin məni təhqir etdi və aramızda mübahisə yarandı. Emin məni görüşə çağırdı. Lakin razılaşmadım. Bu zaman telefonu yanında olan kimsə götürərək, mənə qarşı söyüş söydü. Daha sonra təkrar telefonu Emin götürdü və daha ağır söyüş söydü. Bundan sonra görüşməyə razılaşdım. Eminə görüşə tək gəlməsini bildirdim. Lakin həmin vaxt aramızdakı danışıqdan onun tək gəlməyəcəyini hiss etdim. Buna görə görüşə gedərkən özümü qorumaq üçün bıçaq götürdüm. Görüş yerinə çatdıqda Eminin tək olmadığını, ətrafında daha 3 nəfərin olduğunu gördüm. Söhbət etmək üçün kənara çəkilərkən öz əmim oğlu Fariz də oraya gəldi. Orada Eminin əmisi oğlu Tural mənim əmim oğlunu söyərək getməsini istədi. Bu vaxt Emin məni buraxdı və əmim oğlunu vurdu. Mənə də baş verən hadisələrə görə həyəcanlandım və cibimdə olan bıçaqla Emini vurdum. Sonra bloka tərəf qaçdım. Orada olan bir nəfər əlində olan armaturla mənə tərəf gəldi. Həmin şəxs məndə bıçaq olduğunu gördü və dayandı”.
Təqsirləndirilən şəxs bildirdi ki, hadisə onun yaşadığı evin yaxınlığında baş verib: “Əmim oğlu Fariz həmin vaxt evdə olub. Həyətə çıxarkən səs-küy gəldiyini eşidib və hadisə yerinə gəlib. Emin məni tutaraq orada olan qaranlıq yerə apardı. Mən də onun əlindən çıxmağa çalışdım. Lakin Emin məndən həm canlı olduğundan, həm də onlar 4 nəfər olduqlarından bu mümkün olmadı. Əmim oğlu Farizə də şillə və təpik vurublar. Eminə neçə bıçaq vurduğumu tutulduqdan sonra bilmişəm. Emini bıçaqla vurduqdan sonra həyəcanlı olduğum üçün qaçmışam. Emini bıçaqladıqdan sonra onun yanında olan şəxslər üzərimə gəlib. Lakin məndə bıçaq olduğunu gördükdən sonra dayanıblar”.
İş üzrə zərərçəkmiş Eminin sözlərinə görə, atası ilə birlikdə kafe işlədir: “Günlərin birində tanışım məndən bir nəfəri işə götürməyimizi xahiş etdi. Həmin vaxt işçiyə ehtiyacımız olduğu üçün razılaşdım. Tural gələrək bir müddət işlədi. Daha sonra bir gün Tural məndən borc pul istədi. Biz də insanlıq naminə ona borc verdik. Bundan sonra Tural yoxa çıxdı. Sonradan onun rayonda olduğunu, orada da əmisinin rəhmətə getdiyini öyrəndim. Onun özüm yox, əmim oğlu Tural ilə əlaqə saxladı. Tural əmim oğluna mənim zəng etməli olduğumu bildirdi. Özüm Turala zəng etdim. O, xəstəxanada olduğunu, axşam gələrək danışacağını bildirdi. Axşam Turala zəng vurdum və əgər gələcəksə onu gözləyəcəyimi dedim. Həmin vaxt mübahisə yarandı. Telefonda Tural mənə “siz elə oğlansınız ki, mən ora gəlim söhbət edim?” deyə söylədi və söyüş söydü. Mən də Turala qarşılıq verərək söyüş söydüm və telefonu söndürdüm”.
Emin qeyd edib ki, həmin vaxt Tural “votsap” vasitəsilə səs atıb və ”siz belə oğlansınız ki, üzümə otboy verdiniz?” deyib: “Turalın nömrəsini bloka atmaq istədim. Sonradan fikrimi dəyişərək ondan yerini bildirməsini istədim. Tural hazırda Göyçayda olduğunu, lakin şəhərə gələcəyini bildirdi. Bibim oğlu mənimlə danışan zaman bildirdi ki, Tural tək olmayacaq. O, mənə də tək getməməyi məsləhət bildi. Bu zaman niyyətim yalnız gedərək söhbət etmək olub. Bibim oğlu məndən olduğum yeri ona atamağımı xahiş etdi və ayrı maşınla arxamca gələcəyini bildirdi. Mən maşınını saxlayanda bibim oğlunun gəldiyini və maşını harada saxladığını görmədim. Sonra Turalı gördüm. Adamların yuxarıdan baxdıqlarını bildirərək kənarda söhbət etməyi təklif etdim. Tural gözləməyimi, bir azdan gələcəyini söylədi. Bu zaman Turalın mənim bibim oğlunu gördüyünü düşündüm. Tural öz əmisi oğlunun yanına getdi. Onun əmisi oğlu söyüş söydü, mən də onu itələdim. Həmin vaxt Tural arxamdan sinəmə bıçaqla vurdu. Daha sonra bədənimdən qan fışqırdığını gördüm, özümü itirdim. Maşına tərəf gedəndə yıxıldım, dizimi yerə qoyanda bibimoğlugil məni maşına mindirdilər və apardılar. Gözlərimi reanimasiyada açdım”.
Bu cinayət işinə Bakı Ağır Cinayətlər Məhkəməsində baxılıb. Məhkəmənin hökmü ilə Turalın barəsində Cinayət Məcəlləsinin 70-ci (şərti məhkum etmə) maddəsi tətbiq olunub. Ona 2 il sınaq müddəti olmaqla 3 il 6 ay şərti cəza verilib.
Fariz Məlikli
Demokrat.az
