BAKI, 12 sentyabr. TELEQRAF
ATƏT Daimi Şurasının Vyanada keçirilən iclası zamanı Türkmənistan nümayəndə heyəti quruma üzv dövlətlərin diqqətini beynəlxalq münasibətlərdə neytrallıq prinsiplərinə yönəldib.
Teleqraf xəbər verir ki, bu barədə Türkmənistan Xarici İşlər Nazirliyi məlumat yayıb.
Müzakirə ATƏT Parlament Assambleyasının sədri cənab Pere Joan Pons Sampietronun Daimi Şuraya hesabatının təqdimatı zamanı aparılıb.
Türkmənistan neytrallıq prinsiplərinə sadiqliyini bir daha təsdiqləyib. Bu kontekstdə Türkmənistan ATƏT PA çərçivəsində də sülh və təhlükəsizliyin təşviqi üçün dialoqun təşviqinə və neytrallıq prinsiplərinin möhkəmləndirilməsinə yönəlmiş təşəbbüslər irəli sürüb.
Qeyd edək ki, Aşqabad 2023-2024-cü illərdə parlamentariləri, ekspertləri və beynəlxalq təşkilatların nümayəndələrini bir araya gətirən ATƏT PA-nın iki beynəlxalq konfransına ev sahibliyi edib.
Görüşdə qarşılıqlı etimadın və əməkdaşlığın möhkəmləndirilməsi üçün əsas vasitə kimi çoxtərəfliliyin və neytrallıq prinsiplərinin təşviqinə yönəlmiş mütəmadi konfransların təşkilinin vacibliyi vurğulanıb.
