ain.az, Modern.az portalına istinadən məlumat yayır.
Onlar siyasət meydanında deyil, amma bir çox hallarda diqqət mərkəzində olurlar. Ataları və ya anaları ölkənin taleyüklü məsələlərində önə çıxanda, onların özü də cəmiyyətin maraq dairəsinə düşürlər. Söhbət siyasətçi övladlarından gedir: onlar kimdir, nə işlə məşğuldurlar, valideynlərinin nüfuzu onların həyat yoluna necə təsir edib?Azərbaycan siyasi arenasında Pənah Hüseyn adı ciddi yer tutur. O, 1992-ci ilin mayından 1993-cü ilin aprel ayına kimi dövlət katibi, 1993-cü ilin aprel-iyun aylarında Baş nazir vəzifəsində çalşıb. 2005-2010-cu illərdə III çağırış Milli Məclisin deputatı olub.
Pənah Hüseyn 1999-cu ildə təsis edilmiş Azərbaycan Xalq Partiyasının sədridir. Bu il iyun ayının 16-da partiya sədrinin səlahiyyətlərinin icrasını müavini Qiyas Sadıqova həvalə edib.
Partiya sədrlərinin siyasi fəaliyyətləri, çıxışları, açıqlamaları həmişə diqqət çəkir. Azərbaycan ictimai rəyində belə bir təsəvvür formalaşıb ki, partiya liderləri bir çox məsələlərdə nümunə olmalıdır, eləcə də övlad yetişdirməkdə.
Modern.az saytı “Siyasətçi övladları” rubrikasında Pənah Hüseynin uşaqlarından bəhs edir.
Pənah Hüseynin 1-i oğlan, 2-si qız olmaqla üç övladı var. Oğlu Vaqif 1980-ci ildə anadan olub. Qızları Günay və Aybəniz müvafiq olaraq 1982 və 1984-cü il təvəllüdlüdürlər.
Pənah Hüseynin hər üç övladı Bakı Dövlət Universitetində ali təhsil alıb. Daha sonra xaricdə magistr dərəcəsinə yiyələniblər. Övladlarından ikisi ailə həyatı qurub.
"Mənim, sözün doğrusu, Allaha minnətdarlığım da, fəxrim də övladlarımdır. Oğlum Vaqif Bakı Dövlət Universitetinin Beynəlxalq hüquq fakultəsini, sonra Elmlər Akademiyasının aspiranturasını, ardınca da İstanbul Universitetinin aspiranturasını bitirib. Orada Avropa Birliyi hüququ üzrə elmi iş müdafiə edib və fəlsəfə doktoru adını alıb. 2020-ci ildə könüllü olaraq Vətən müharibəsinə yollanıb. Ali Baş Komandan İlham Əliyev tərəfindən “Füzulinin azad edilməsinə görə”, "Xocavəndin azad edilməsinə görə” medalları ilə təltif olunub", - deyə siyasətçi bildirib.
Pənah Hüseynin böyük qızı Günay atasının yolunu gedərək Bakı Dövlət Universitetinin Tarix fakultəsini, daha sonra AMEA Tarix İnstitununun aspiranturasını bitirib, tarix üzrə fəlsəfə doktorudur.
Kiçik qızı Aybəniz Bakı Dövlət Universitetinin Hüquq fakultəsini bitirib. Sonra Lefkoşo Ağdəniz Universitetində (Şimali Kipr-red.) magistr və doktoralıq təhsili alıb. Bir müddət orada professor assistenti kimi çalışıb, beynəlxalq münasibətlər nəzəriyəsindən ingilis dilində dərs deyib.
Pənah Hüseynin övladları indi hansı işlərdə çalışırlar?
AXP lideri bildirib ki, oğlu Vaqif Hüseyn bir neçə universitetdə dərs deyir, eyni zamanda “Yeni Müsavat” Media Qrupunun hüquqşünasıdır. Qızı Günay isə Bakı Avrasiya Universitetinin müəllimidir. İctimai-siyasi sahədə hər üçünün, xüsusilə də Vaqif və Günayın fəaliyyətləri var. Kiçik qızı Aybəniz də bir sıra beynəlxalq layihələrdə çalışıb. O, hazırda elmi işinin müdafiəsi ilə məşğuldur.“Hər üçü öz təhsil istiqamətlərini özləri müəyən ediblər, nəyə nail olublarsa, özlərinin zəhməti sayəsinə çatıblar, mənim bu məsələlərdə rolum minimum olub”,- deyə partiya sədri əlavə edib.
P.Hüseyn övladları ilə bağlı arzusunu bizimlə bölüşüb:“Mən Bayıl həbsxanasında olanda evə məktublar yazmışdım. Onlardan bir qismini övladlarıma ünvanlamışam. Həyat yoldaşım vəfat etdikdən sonra onun xatirəsinə kitab çap etdirdik, ora həmin məktublar da salınıb. Birində yazmışdım ki, “əsas olan nə təhsil, nə vəzifə, nə də sərvətdir. Əsas olan xoşbəxtlikdir. Və mən xoşbəxtəm. Ananız kimi həyat yoldaşım, sizin kimi övladlarım var. Sizə də arzu edirəm ki, mənim olduğu kimi həyat yoldaşlarınız, elə sizin kimi də övladlarınız olsun”.
İndi Günayın Kənanla xoşbəxt ailəsi, Səlcuq və Alper kimi oğulları var. Vaqif də Aynurla xoşbəxt oldu. İsmayıl və Altay adlı iki övlad atasıdır. Yəni insanın xoşbəxtliyin düsturu gözəl ailəyə, övladlara, dostlara malik olmaqdır. Aybəniz də xoşbəxt olacaq inşallah".
Siyasətçinin bu yaxınlarda yeni nəvəsi dünyaya gəlib:
"Yuxarıda dediklərimdən məlum oldu. 4 nəvəm vardı, 4-ü də oğlan. 4 əsgər. Düz 50 gün əvvəl oğlum Vaqiflə gəlinim Aynurun qızları - dünyanın gözəli Aysu dünyaya gəldi, oldular 5. O, nənəsi bizi tərk edəndən sonra boşalmış dünyamı öz işığı ilə xeyli doldurdu. Tanrıya şükürlər olsun! Və hamıya, hər kəsə, bütün baba-nənələrə, bütün ata-analara, bütün oğul və qızlara özümə, öz ovladlarıma etdiyim arzuları edirəm. Çin olsun!"
Hadisənin gedişatını izləmək üçün ain.az saytında ən son yeniliklərə baxın.
