Bakı, 16 sentyabr, AZƏRTAC
Təhsildə Keyfiyyət Təminatı Agentliyi (TKTA) xarici kvalifikasiyaların tanınması ilə bağlı 3480 müraciət üzrə ekspertiza həyata keçirib.
AZƏRTAC xəbər verir ki, bu fikirləri TKTA-nın İdarə Heyətinin sədri Tural Əhmədov bu gün keçirilən brifinqdə deyib. O bildirib ki, 491 xarici kvalifikasiyanın isə ölkə ərazisində tanınması barədə mənfi rəy verilib: “Mənfi rəyin verilməsində bir neçə amil səbəb olub:
- Tədris yükünü mənimsəmək üçün təhsil alınan ölkənin ərazisində tələb olunan normativdən az olma səbəbilə 344 imtina;
- Təhsilalma forması üzrə uyğunsuzluq səbəbilə 33 imtina;
- Autentik (həqiqi) olmayan diplom səbəbilə 23 imtina;
- Tədris yükünü mənimsəmək üçün təhsil aldığı ölkənin ərazisində tələb olunan normativdən az olma və əhəmiyyətli fərq (ixtisas ve qeyri-ixtisas fənlərinin nisbəti üzrə əldə olunan kredit sayı) səbəbilə 19 imtina;
- Akkreditasiyasız ali təhsil müəssisəsi səbəbilə 22 imtina;
- Ekvivalenti olmayan ixtisas səbəbilə 8 imtina;
- Akkreditasiyasız ali təhsil müəssisəsi və tədris yükünü mənimsəmək üçün təhsil alınan ölkənin ərazisində tələb olunan normativdən az olma səbəbilə 8 imtina;
- Əhəmiyyətli fərq (ixtisas və qeyri-ixtisas fənlərinin nisbəti üzrə əldə olunan kredit sayı) səbəbilə 7 imtina;
- Bakalavr diplomu üzrə kvalifikasiya tanınmadığı üçün magistr diplomuna imtina verilməsi səbəbilə isə 6 imtina”.
