Xətai rayonu, Bakı Ağ Şəhər, Mərkəzi Bulvar küç., 5 üvanında - “Park Həyat” yaşayış komplekinin 1-ci mərtəbəsində yerləşən obyektin pəncərəsində “Stop Gas Terror” yazılıb.
Obyektin girişində vurulmuş lövhədən məlum olur ki, iş yerində “Şimal Servis” adlı şirkət fəaliyyət göstərir. Nə üçün şirkətin ofisinin pəncərəsində “Stop Gas Terror” şüarı yerləşdirildiyi ilə maraqlandıq.
“Texniki otaqlar şantaj vasitəsinə çevirilib”
“Şimal Servis” QSC-nin rəhbəri Fuad Zülfüqarov Marja.az-a bildirdi ki, Ağ Şəhər layihəsində fəaliyyət göstərən bir sıra iş adamları açıq şəkildə “işgəncə” ilə rastlaşırlar. “Şimal Servis” QSC-nin rəhbəri iddia edir ki, satış məqsədli olmayan texniki otaqların (köməkçi otaqların - red) iş adamları, şirkətlər tərəfindən satın alması üçün süni problem yaradılır:
“Belə ki, bir sıra yaşayış komplekslərinin 1-ci mərtəbələrdə yerləşən qeyri-yaşayış obyektlərinin texniki otaqları şantaj vasitəsinə çevirilib. Birincisi odur ki, bu texniki otaqlar satış məqsədli olmamalarına baxmayaraq, binaları tikən bəzi MTK-lar həmin sahələrin istifadəsində sahibkarlara əngəllər yaradaraq, texniki otaqları alqı-satqı predmetinə çevirməyə çalışırlar”.
Fuad Zülfüqarov qeyd etdi ki, yaranmış ağır vəziyyət ilə əlaqədar olaraq Bakı Ağ Şəhər layihəsinin rəhbərliyinə, “Azəriqaz”a rəsmi müraciət edilib, lakin indiyədək problem həllini tapmayıb.
“FHN bildirir ki, havalandırma olan yerdə qaz avadanlıqlarının quraşdırılması qadağandır, lakin “Azəriqaz" avadanlıqların köçürülməsindən imtina edir”
Fuad Zülfüqarov “Şimal Servis” QSC-nin kollektivinin üzləşdiyi problem ilə haqqında ətraflı danışdı:
“Məlumat üçün bildirim ki, “ART LİNE” MTK tərəfindən inşa olunmuş “Park Həyat” yaşayış kompleksində yerləşən “Şimal Servis” QSC-nin ofisinin havalandırma sisteminin olduğu texniki otaqda qəsdən qaz avadanlıqları quraşdırılıb. Qaz qızdırıcılarından istifadəsi nəticəsində yaranan zərərli qazlar bizim ofisimizə dolur.
Müraciətlərimizdən sonra yaranmış vəziyyət Dövlət Yanğın Nəzarəti Xidmətində əməkdaşları tərəfindən də araşdırılmışdır. Araşdırma zamanı Xətai rayonu, Ağ şəhər, Mərkəzi Bulvar küçəsi ev 5 ünvanında yerləşən yaşayış binasının birinci mərtəbəsində fəaliyyət göstərən uşaq bağçasına məxsus köməkçi otaqda kombi tipli isitmə cihazı və qonşu obyektin havalandırma borusunun yerləşdirildiyi və kombi tipli isitmə cihazınıdan istifadə zamanı ayrılan dəm qazının qeyri yaşayış obyektinin havalandırma borusu vasitəsilə qonşu obyektlərə dolduğu məlum olmuşdur.
Dövlət Yanğın Nəzarəti Xidmətinin rəisi “Azəriqaz" İstehsalt Birliyinin rəhbərliyinə göndərdiyi məktubda qeyd olunanları nəzərə alaraq sözügedən ünvana baxış keçirilməsi və qanunamüvafiq tədbirlər görülməsi üçün aidiyyati üzrə göstəriş verməyini xahiş edib.
Fövqəladə Hallar Nazirliyinin (FHN) qaynar xəttinə zəng edən zaman operatorlar bildirir ki, havalandırma olan yerdə qaz avadanlıqlarının quraşdırılması qadağandır!
“Azəriqaz”ın əməkdaşları isə bildirirlər ki, qaz avadanlıqları layihə sənədlərinə uyğun olaraq quraşdırılıb və avadanlıqların köçürülməsindən imtina ediblər. Nəticədə dəm qazı “Şimal Servis” QSC-nin ofisinə 2024-cü ilin oktyabr ayından dolur.
Qeyd etdiymi kimi, bu fakt FHN strukturları tərəfindən təsdiq olunub. Lakin avadanlıqların köçürülməsi təmin olunmur və hətta FHN əməkdaşları tərəfindən bu problemin MTK ilə həll olunması tövsiyyə olunur. MTK isə binanın tikintisi 10 il bundan öncə bitməsinə baxmayaraq fəaliyyətini hələ də həmin yaşayış kompleksində davam etdirir. İndi isə qazla şantaj edərək satış məqsədli olmayan texniki otaqları satın almağa məcbur edir. Bu hala müvafiq səlahiyyətli qurumlar göz yumurlar. Görəsən bu haqsızlıqlar və özbaşınalıqlara nə vaxta qədər göz yumulacaq?”
"Sağlamlığımız üçün zərərli şərait və fəaliyyətimiz üçün çətinlik yaranıb”
Fuad Zülfüqarov əlavə etdi ki, sözügedən texniki otaq məhz "Şimal Servis" QSC üçün nəzərdə tutulmasına, bağça üçün isə ayrılmış texniki otaq olmasına baxmayaraq, bağça "Şimal Servis"in ofisi üçün nəzərdə tutulmuş texniki otaqda qaz avadanlıqlarını quraşdırmışdır:
“Nəticədə bizim sağlamlığımız üçün zərərli şərait və fəaliyyətimizə çətinlik yaranmışdır. "Şimal Servis" bağçanın qaz avadanlıqlarının bizim üçün nəzərdə tutulmuş texniki otaqdan köçürülməsini və əməkdaşlarımız üçün təhlükəsiz şəraitin yaradılmasını istəyir”.
