Fransa son illərin ən böyük tətil günlərindən biri ilə üz-üzədir. Həmkarlar ittifaqları nadir bir birlik nümayiş etdirərək yeni baş nazir Sebastyan Lekornunu büdcə ixtisarlarına yenidən baxmağa, əməkhaqqı, pensiya və ictimai xidmətlərlə bağlı addımlar atmağa məcbur etmək istəyir.
Polisin məlumatına görə, ölkə üzrə keçiriləcək yürüşlərdə təxminən 800 min nəfərin iştirak edəcəyi gözlənilir. Məktəblər, dəmir yolları və hava nəqliyyatı işində ciddi pozuntular baş verəcək. Təhlükəsizliyi təmin etmək üçün 80 min polis əməkdaşı səfərbər olunacaq.
Bu, 2023-cü ildən bəri Fransada ən böyük etiraz günü olacaq. Həmin vaxt prezident Emmanuel Makron parlament səsverməsi olmadan pensiya yaşını 64-ə qaldırmaq üçün icra səlahiyyətlərindən istifadə etmiş və kütləvi narazılığa səbəb olmuşdu.
Bu arada Fransada siyasi böhran dərinləşir. Ötən həftə Makron bir il ərzində üçüncü dəfə baş nazir dəyişərək yaxın müttəfiqi Lekornunu bu posta təyin edib. Ondan əvvəlki baş nazirlər Fransua Bayru və Mişel Barnye büdcə ilə bağlı parlamentdəki kəskin ixtilaflar nəticəsində vəzifədən uzaqlaşdırılmışdı.
Xatırladaq ki, Bayru sentyabrın 8-də parlamentdə etimad səsverməsini uduzaraq postunu itirmişdi. Onun 44 milyard avroluq sərt qənaət planı kəskin etiraz doğurmuşdu. Lekornu bəyan edib ki, Bayrunun iki ictimai bayram gününü ləğv etmək təklifindən imtina edəcək, lakin həmkarlar ittifaqları sosial xərclərin dondurulması kimi digər qənaət tədbirlərinin qüvvədə qalacağından narahatdır.Qeyd edək ki, Fransanın büdcə kəsiri Avropa İttifaqının 3 faiz həddini ikiqat üstələyir, dövlət borcu isə ÜDM-in 114 faizi həcmindədir.
