Diyetoloqlar bildirirlər ki, bağırsağın sağlamlığını qorumaq üçün bahalı əlavələr almağa ehtiyac yoxdur.
HİT.az xəbər verir ki, mətbəximizdə mövcud olan bəzi içkilər bu işdə böyük köməkçi ola bilər. Mütəxəssislərin sözlərinə görə, ən yaxşı seçim isə zəncəfil çayıdır.
Zəncəfil çayı iltihab əleyhinə, antioksidant və həzmə dəstək verən xüsusiyyətlərinin unikal birləşməsi ilə seçilir. Bu səbəbdən müxtəlif həzm problemlərinin yüngülləşdirilməsində çox təsirli vasitə hesab olunur.
Ürəkbulanmanı azaldır. Dietoloq Kristal Orosko qeyd edir ki, zəncəfil çayı tez-tez qarın ağrısı, köp və ürəkbulanma yaşayan insanlar üçün uyğundur. Zəncəfilin tərkibindəki təbii maddələr — xüsusilə ginqerollar — bağırsaqdakı serotonin reseptorlarını bloklayaraq qusma refleksini zəiflədir. Bu da ümumi rahatlıq hissi yaradır. Orosko əlavə edib: "Mən hər zaman limon və balla qarışdırılmış zəncəfil çayını məsləhət görürəm, çünki mədə ağrılarını və narahatlığı yüngülləşdirir".
Mədə pozğunluğunu azaldır. Araşdırmalar göstərir ki, zəncəfil mədədə artıq turşunun ifrazını azalda bilər. Bu isə reflüks xəstəliyinin simptomlarını yüngülləşdirir, eləcə də mədə spazmlarını, köpü və həzmsizlikdən doğan narahatlığı aradan qaldıra bilir.
İltihabı zəiflədir. Xroniki iltihab bağırsağın selikli qişasına zərər verərək iltihabi bağırsaq xəstəliyi və ya yüksək keçiricilik sindromu kimi problemlərə yol aça bilər. İdman dietoloqu Kilin Merfi bildirir: "Zəncəfilin bioaktiv tərkib hissəsi — ginqerol — güclü antioksidantdır və bağırsaqdakı iltihabı azalda bilər".
Bu, selikli qişanın şişkinliyini və qıcıqlanmanı aradan qaldıraraq bağırsağı zədələrdən qoruyur. Merfi əlavə edib ki, o, idmançılarına fiziki yüklənmənin yaratdığı həzm problemlərini azaltmaq üçün zəncəfil çayı məsləhət görür.
Samir
