Müharibə və geosiyasi qeyri-sabitlik İsveçdə öz nüvə silahını yaratmaqla bağlı müzakirələrə yol açıb.
Reyting.az-ın məlumatına görə,“Times” nəşri bu müzakirələr fonunda 1956 və 1957-ci illərdə İsveç hakimiyyətinin milli nüvə silahı proqramına hazırlıq məqsədilə Laplandiyada hərbi poliqonda gizli şəkildə güclü bombalar partlatdığını xatırladır.
Nəşr qeyd edir ki, müzakirə hələlik spekulyativ olaraq qalır və hökumətin nüvə başlıqlarının yaradılmasına ciddi yanaşdığına dair heç bir sübut yoxdur, lakin müzakirələr artıq siyasi sferaya sıçrayıb.
Sağçı İsveç Demokratlar Partiyasının lideri Cimmi Akesson bildirib ki, ölkənin çoxdan nüvə texnologiyası sahəsində böyük təcrübəsi var: “Lakin siyasi iradə fərqli bir şey tələb edib. Məncə, bu vəziyyətdə hər şey nümayiş etdirilməlidir".
İsveç Müdafiə Tədqiqatları İnstitutunun tədqiqatçısı Robert Dahlsjö seminarda deyib ki, “biz indi İsveç komponentli müstəqil nüvə silahlarını müzakirə etməliyik”.
Avropa Parlamentinin deputatı Alice Teodorescu Mave də İsveçin ümumi Avropa nüvə silahı strategiyasında rol oynamalı olduğunu elan edib.
“Times”in yazdığına görə, İsveçin mövcud nüvə dövlətinin əhəmiyyətli yardımı olmadan nüvə silahı yaratmaq üçün texnoloji və ya sənaye potensialına malik olub-olmadığı aydın deyil. Ölkədə elektrik enerjisinin təxminən üçdə birini təmin edən altı atom elektrik stansiyası olsa da, sonuncu belə stansiya 40 il əvvəl tikilib.
İsveç Müdafiə Tədqiqat İnstitutunun nüvə silahı üzrə eksperti Martin Goliath deyib ki, bu, çox böyük sənaye layihəsi olardı: “Nüvə silahlarına lazım olan materialların istehsalı üçün bütün infrastruktur da daxil olmaqla, çox şey inkişaf etdirilməlidir. Bunun üçün əhəmiyyətli investisiyalar tələb olunur. Məncə, lazımi resursları tapmaq faktiki olaraq mümkün olmayacaq”.
Polşa prezidenti Karol Navroki daha əvvəl ölkəsinin nüvə silahı yerləşdirmək istəyini ifadə edib və bu məsələdə Fransanın ona kömək edəcəyinə ümid bəsləyir.
Baş nazir Donald Tusk Polşanın öz nüvə silahını inkişaf etdirməyi düşünə biləcəyinə işarə edib.
E. KAMAL
