Çinin yeni 6-cı nəsil döyüş təyyarəsi J-36 ilə bağlı yayılan görüntülər beynəlxalq gündəmdə qalmaqda davam edir.
Turkustan.az xəbər verir ki, ilk sınaq uçuşunu 2024-cü il dekabrın 26-da Chengdu Təyyarə Şirkətinin yerləşdiyi Sıçuan əyalətinin paytaxtı Çenqdu üzərində həyata keçirən Çin, indi daha bir sınaq mərhələsini geridə qoyub.
Bu son sınaq, əvvəllər 2028-ci ilə yaxın ilk uçuşu proqnozlaşdıran analitikləri təəccübləndirib. Mütəxəssislər bu sürətli inkişafın, ehtimal ki, daha əvvəl ictimaiyyətə açıqlanmayan hazırlıq mərhələləri və testlərlə mümkün olduğunu bildirirlər.
Müşahidəçilər J-36-nın qabaqcıl radardan yayınma (stealth) və dözümlülük imkanlarına sahib ola biləcəyini qeyd edirlər. Təyyarə hələ rəsmi olaraq təqdim olunmasa da, texnoloji baxımdan ABŞ-ın F-35 modeli və Rusiya istehsalı müasir qırıcıları geridə qoyduğu irəli sürülür.
Bəzi iddialara görə, J-36 hipersəs sürətinə (Mach 5 və üzəri) çata və orbitə qədər yüksələ biləcək texniki xüsusiyyətlərə sahib ola bilər. Bu isə onu yalnız bir döyüş təyyarəsi deyil, həm də strateji üstünlük vasitəsinə çevirə bilər.
Aytən Yaşar/ Turkustan.az
