Ermənistan 4 min azərbaycanlının taleyi haqqında hələ də məlumat vermir
Azərbaycan xarici işlər nazirinin müavini Elnur Məmmədov itkin düşən 4 minə yaxın azərbaycanlının taleyi ilə bağlı çağırış edib. Diplomat bunu BMT-nin Baş Assambleyasının 80-ci sessiyasında edib.
E.Məmmədov sessiya çərçivəsində “Silahlı münaqişələr zamanı itkin düşmüş şəxslər: cavabların axtarışının genişləndirilməsi” mövzusunda Yüksək Səviyyəli Görüşdə iştirak edib. Nazir müavini çıxışında Ermənistanın təcavüzü nəticəsində itkin düşmüş 4 minə yaxın azərbaycanlının taleyinə diqqət çəkib, həqiqətin və ədalətin təmin olunması üçün beynəlxalq səylərin gücləndirilməsinə çağırıb.
Amma rəsmi İrəvan itkin hesab olunan 4 min azərbaycanlının taleyi haqqında hələ də məlumat vermir. İtkin düşənlərin yaxınlarının beynəlxalq məhkəmələrə müraciət etmək hüququ var. Bu ilin fevralında Azərbaycan-Ermənistan dövlət sərhədində Azərbaycanın Əsir və itkin düşmüş, girov götürülmüş vətəndaşlarla əlaqədar Dövlət Komissiyası və Ermənistanın Əsir düşmüş, saxlanılmış və itkin (yeri məlum olmayan) şəxslər üzrə idarələrarası komissiyasının nümayəndələri arasında görüş keçirilib.
Burada yalnız komissiyalar arasında ikitərəfli əsasda müzakirələrin davam etdirilməsi barədə razılığa gəlinib, Ermənistan yenə də Azərbaycan tərəfə əsir və itkin düşmüş, girov götürülmüş vətəndaşlarımızın taleyi ilə bağlı heç bir məlumat verməyib.
Azərbaycan dövləti ən müxtəlif səviyyələrdə əsir və itkin düşmüş, girov götürülmüş vətəndaşlarımızın taleyinə aydınlıq gətirilməsi üçün Ermənistana müraciət edib. Amma İrəvan bu müraciətlərə yayındırıcı münasibət göstərib. Biz bunu idarələrarası komissiya üzvlərinin son görüşündən də aydın görürük. Ermənistan Azərbaycana informasiya vermək istəmir, müxtəlif bəhanələrlə bundan yayınır. Belə olmasaydı, Ermənistan rəhbərliyi öz vədinə əməl edər və Azərbaycan vətəndaşlarının naməlum taleyinə aydınlıq gətirər, onların nə qədərinin öldürüldüyünü, nə qədərinin hələ də əsir, girov kimi saxlanıldığını etiraf edərdi.
İndi yeni situasiya odur ki, sülh sənədi paraflanıb, ortada bir dialoq, etimad mühiti yaratmaq səyləri var. Ən azı Ermənistan bundan sonra 4 min itkinlə bağlı məlumat verə bilər...
Polad Mehdiyev
Hüquqşünas Polad Mehdiyev “Yeni Müsavat”a açıqlamasında bildirdi ki, otuz il davam edən Ermənistan-Azərbaycan münaqişəsinin ən faciəvi nəticələrindən biri də təxminən 4 min Azərbaycan vətəndaşının itkin düşməsidir: “Bu insanların taleyinə hələ də aydınlıq gətirilməyib. İstər hərbi əməliyyatlar dövründə, istərsə də müharibədən sonrakı mərhələlərdə Ermənistan tərəfi məlumat verməkdən ya imtina edib, ya da müxtəlif bəhanələrlə bu öhdəlikdən yayınmağa çalışıb. Hazırda isə situasiya fərqlidir. Sülh sənədi artıq paraflanıb, qarşılıqlı dialoq üçün zəmin yaranıb. Bu baxımdan, Ermənistanın öz beynəlxalq öhdəliklərini yerinə yetirərək itkin düşmüş azərbaycanlılarla bağlı məlumatları təqdim etməsi həm hüquqi, həm də siyasi-mənəvi baxımdan zərurətə çevrilmişdir. Ermənistan 1949-cu il Cenevrə konvensiyalarına qoşulmaqla, münaqişə zamanı əsir və itkin düşən şəxslərlə bağlı məlumatları təqdim etməyə beynəlxalq hüquqi öhdəlik götürüb. Həm bu konvensiyalar, həm də BMT Təhlükəsizlik Şurasının 2474 saylı qətnaməsi dövlətləri şəffaflığa və bu insanların taleyinin aydınlaşdırılmasına çağırır.
Hər bir şəxsin yaşamaq və ailəsinə məlumat vermək hüququ var. Ermənistan bu hüquqları pozaraq, azərbaycanlı itkinlərlə bağlı məlumatları gizlədir. Bu isə insanlıq əleyhinə hərəkət kimi qiymətləndirilə bilər.
Azərbaycan isə bu məsələni həm beynəlxalq platformalarda qaldırır, həm də BQXK ilə əməkdaşlıq edir. Xarici işlər nazirinin müavini Elnur Məmmədovun BMT-də etdiyi çağırış da bu istiqamətdə ciddi addımdır. Bu məsələ sülh prosesində etimad mühitinin qurulması üçün əsas şərtlərdən biridir".
Nigar HƏSƏNLİ,
“Yeni Müsavat”
