ain.az, Azpolitika.az saytına istinadən bildirir.
Böyük Britaniyanın kəşfiyyat orqanı MI5-in keçmiş rəhbəri Eliza Manningham-Buller ölkəsinin artıq Rusiya ilə faktiki olaraq müharibə vəziyyətində ola biləcəyini bəyan edib. Onun sözlərinə görə, bu qarşıdurma ənənəvi tank və artilleriya döyüşləri ilə deyil, kiberhücumlar, diversiyalar və kəşfiyyat əməliyyatları vasitəsilə həyata keçirilir.
Manningham-Buller bildirib ki, Moskvanın fəaliyyətləri Britaniyanın milli təhlükəsizliyi üçün birbaşa təhdid yaradır. Buna görə də London qarşıdakı dövrdə daha çevik və müasir təhlükəsizlik strategiyaları hazırlamalıdır.
Keçmiş MI5 rəhbəri həmçinin xatırladıb ki, əvvəllər Rusiya ilə əməkdaşlıq imkanlarına ümidlər vardı. Lakin 2006-cı ildə Aleksandr Litvinenkonun Londonda zəhərlənərək öldürülməsindən sonra bu ümidlər tamamilə puç oldu.
Manningham-Bullerin xəbərdarlığı Britaniyada son illərdə artan kiberhücum fonunda daha da aktuallaşır. 2023 və 2024-cü illərdə Britaniya hakimiyyəti Rusiyanın dəstəklədiyi “Star Blizzard” adlı haker qrupunu parlament üzvlərinə, Müdafiə Nazirliyinə və seçki strukturlarına qarşı kiberhücumlarda ittiham edib.
Bundan əlavə, bu il yayılan məlumatlara görə, Kremlə bağlı haker şəbəkələri Britaniyanın enerji infrastrukturu və maliyyə sektoruna qarşı da kibercasusluq fəaliyyətləri həyata keçirib. Ekspertlərin fikrincə, məqsəd həm gizli məlumat toplamaq, həm də ictimaiyyət arasında etimadsızlıq yaratmaqdır.
Manningham-Bullerin sözlərinə görə, Rusiyanın Qərbə qarşı uzunmüddətli düşmənçilik mövqeyi artıq tam aydındır. O, vurğulayıb ki, NATO ölkələri yalnız birgə və koordinasiyalı fəaliyyət sayəsində Moskvanın bu cür hibrid təhdidlərinə cavab verə bilərlər.
Rasim
“AzPolitika.info”
Hadisənin gedişatını izləmək üçün ain.az saytında ən son yeniliklərə baxın.
