MBDA şirkəti İtaliya Hərbi Dəniz Qüvvələri (HDQ) üçün inkişaf etdirilən TESEO MK2/E gəmi əleyhinə raketinin istehsalına dair ölkənin Hərbi Dəniz Silahlanmaları üzrə Milli Direktorluğu ilə müqavilə imzalayıb.
“Poliqon” MBDA-ya istinadən xəbər verir ki, müqavilə İtaliya HDQ-nin hərbi gəmiləri üçün yeni nəsil TESEO MK2/E gəmi əleyhinə raketlərinin tədarükünü əhatə edir.
Bildirilib ki, bunların sırasına FREMM EVO sinifli freqatlar, yeni nəsil DDX destroyerləri, çoxməqsədli döyüş və patrul gəmiləri daxildir. Raket həmçinin FREMM və “Horizon” sinifli gəmilərdə artıq xidmətdə olan əvvəlki MK2/A versiyasını da tamamlayacaq.
İstehsal müqaviləsi, 2021-ci ildə imzalanmış raketin hazırlanması, inteqrasiyası və sınaqdan keçirilməsi üzrə əvvəlki müqavilənin davamıdır. TESEO MK2/E İtaliya Hərbi Dəniz Qüvvələrinin tələblərinə cavab vermək üçün tamamilə yeni silah sistemi kimi hazırlanıb. AESA (Active Electronically Scanned Array) tipli axtarıcı texnologiyası sayəsində raket istifadəçiyə bir sıra innovativ imkanlar təklif edir. Məsələn, o, həm çox uzaq məsafəli dəniz, həm də quru hədəflərinə qarşı istifadə oluna bilir. Bununla yanaşı, peyk məlumat bağlantısı vasitəsilə uçuş zamanı idarəetmə də daxil olmaqla təkmilləşdirilmiş missiya planlamasına imkan yaradır və əlavə olaraq dərin zərbə qabiliyyəti təmin edir.
