Azertag saytından əldə olunan məlumata görə, ain.az məlumat yayır.
Bakı, 1 oktyabr, AZƏRTAC
XI Bakı Beynəlxalq Kitab Sərgisi çərçivəsində Azərbaycanın Xalq yazıçısı, Dövlət mükafatı laureatı Maqsud İbrahimbəyovun “Qara paltarlı qadın” romanının özbək dilinə tərcüməsinin təqdimat mərasimi keçirilib.
AZƏRTAC xəbər verir ki, kitab Azərbaycan Respublikasının Mədəniyyət Nazirliyi ilə Azərbaycanın Özbəkistandakı səfirliyi nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin birgə layihəsi çərçivəsində hazırlanıb.
Tədbiri giriş sözü ilə açan Heydər Əliyev adına Azərbaycan Mədəniyyət Mərkəzinin direktoru Akif Marifli qeyd edib ki, romanın nəşri Prezident İlham Əliyevin Sərəncamına uyğun olaraq yazıçının 90 illik yubileyi ilə bağlı keçirilən silsilə tədbirlərin mühüm tərkib hissəsidir.
O, Maqsud İbrahimbəyovun Azərbaycan ədəbiyyatının ən görkəmli simalarından biri olduğunu, dramaturq, ssenarist, rejissor kimi fərqləndiyini vurğulayıb. Əsərin bədii məziyyətindən danışan A.Marifli “Qara paltarlı qadın” romanında insan psixologiyasının, həyat dramının incəliklərinin ustalıqla əks etdirildiyini diqqətə çatdırıb. O bildirib ki, romanın özbək dilində nəşri yeni oxucu kütləsinə qapı açmaqla yanaşı, ədəbiyyatşünaslıq üçün dəyərli mənbəyə çevrilir.
Maqsud İbrahimbəyov adına Yaradıcılıq Mərkəzinin direktoru Anna İbrahimbəyova romanın süjetinin insan talelərinin dərin psixoloji çalarları ilə zəngin olduğunu vurğulayıb. O, müəllifin personajların şəxsiyyətlərini canlı və inandırıcı şəkildə canlandıra bildiyini və bunun əsərə xüsusi bədii-ədəbi əhəmiyyət verdiyini qeyd edib.
Kitabın illüstratoru Orxan Qarayev, yazıçı Mürşüd İsmayılzadə, Bakıdakı Oksbric Akademiyasının direktoru Nailə Rzayeva təqdimatlarında qeyd ediblər ki, romanda sovet dövrünün həyat tərzi, sosial mühit, insan münasibətləri barədə həqiqətlər ustalıqla təsvir olunub. “Qara paltarlı qadın” obrazı həm faciə, həm də insan müqavimətinin rəmzi kimi səciyyələndirilib.
Qeyd olunub ki, əsərin zamanla öz təsirini itirməyən qalıcı aktuallığı da bununla izah edilir.
Tədbirdə, həmçinin roman əsasında hazırlanan və insan ruhunun ziddiyyətlərini, faciəli taleləri, dərin mənəvi sarsıntıları canlandıran teatrlaşdırılmış tamaşa nümayiş etdirilib. Tamaşanın quruluşçu rejissoru Tural Vaqifoğludur. Baş rolları Azərbaycanın Əməkdar artisti Elşən Rüstəmov və aktrisa Günəş Mehdizadə ifa ediblər.
Qeyd edək ki, bu əsər yaradıcılığı onilliklər boyu Azərbaycan ədəbiyyatında və mədəniyyətində dərin iz qoymuş görkəmli yazıçının sonuncu romanı olub.
Təqdimat iştirakçıları romanın özbək dilinə tərcüməsinin Azərbaycan ilə Özbəkistan arasında mədəni əlaqələrin inkişafında mühüm addım olmaqla yanaşı, ədəbi dialoqun parlaq nümunəsinə çevrildiyini vurğulayıblar.
Qeyd edək ki, bu yaxınlarda kitabın üç dildə, o cümlədən özbək dilində yenidən nəşr edilməsi müəllifin yaradıcılığının daha geniş oxucu kütləsi arasında populyarlaşdırılması üçün yeni imkanlar açıb.
Roman 1980-1990-cı illərin hadisələrini əhatə edir və tarixin dönüş nöqtəsində bir insanın sosial ədalət uğrunda mübarizəsindən bəhs edir. Əsərin mərkəzi personajı həyat itkilərinə və sınaqlara baxmayaraq, öz prinsiplərinə və ləyaqətinə sadiq qalan bir şəxsiyyət kimi meydana çıxır.
Ən son xəbərləri və yenilikləri almaq üçün ain.az saytını izləyin.
