ASELSAN şirkətinin ANTIDOT 2-U 200 elektron hücum (EH) podu ilk uçuşunu uğurla tamamlayaraq eyni anda çoxsaylı düşmən radarını aşkarlamaq, təhlil etmək və aldatmaq qabiliyyətini nümayiş etdirib.
“Poliqon” ASELSAN-a istinadən xəbər verir ki, Türkiyə Silahlı Qüvvələrinin nümayəndə heyəti tərəfindən qiymətləndirilən sistem müasir hava hücumundan müdafiə təhdidlərinin zərərsizləşdirilməsində effektivliyinə görə yüksək qiymətlər qazanıb.
Əvvəlki ANTIDOT elektron dəstək (ED) podu əsasında inkişaf etdirilən yeni sistem ED və EH funksiyalarını tək, yüngül podda birləşdirir və pilotsuz uçuş aparatları (PUA) üçün nəzərdə tutulub. Modullu arxitekturası sayəsində taktiki sinif PUA-lara da quraşdırıla bilər ki, bu da əməliyyat çevikliyini artırır.
Tamamilə avtonom işləyən ANTIDOT 2-U 200 geniş tezlik və bucaq əhatəsi, yüksək çıxış gücü və eyni anda bir neçə radarla paralel mübarizə aparmaq imkanları təqdim edir. Quraşdırıldığı PUA-nı qorumaqla yanaşı, dost hava vasitələri üçün də təhlükəsiz dəhlizlər yaradır. Tərəfdaş ölkələrə təklif olunan ANTIDOT 2-U 200 Türkiyənin növbəti nəsil hava əsaslı elektron müharibədə liderliyini daha da möhkəmləndirir.
