Uzun müddət bodibildinqlə (bədən inkişaf etdirmə) məşğul olan gənc idmançı növbəti məşq zamanı ürək nahiyəsində ağrı hiss edib. Bodibilder onunla eyni zalda məşq edən təcrübəli məşqçi Emin Babayev ("Çaqayev" ləqəbi ilə daha çox tanınır - red.) tərəfindən təcili xəstəxanaya gətirilib.
Bu barədə anestezioloq-reanimatoloq Qulam Rüstəmzadə özünün sosial şəbəkə hesabında paylaşım edib.
O qeyd edib ki, təcili yardım həkimi EKQ müayinəsində kəskin miokard infarktına xas olan dəyişikliklər müşahidə edib və dərhal invaziv kardioloji heyətə məlumat verib.
"Pasiyent təcili olaraq angioqrafiya əməliyyatxanasına alınaraq müdaxilə üçün hazırlanıb. Müdaxiləyədək 7 dəfə ürək dayanması olub və elektroşokerlə ürək yenidən işə salınıb. Peşəkar invaziv kardioloq tərəfindən təcili müdaxilə olunaraq ürəyin tıxanmış damarı açılıb və stent qoyulub. Pasiyent iki gün sonra qənaətbəxş şəkildə evə göndərilib. Nəzərə çatdıraq ki, miokard infarktının səbəbi idman deyil, insanların dövri olaraq çek-ap müayinələrindən keçməməsidir. Sağlamlığınıza nəzarət etməyi tövsiyə edirik", - deyə həkim yazıb.
Oxu.az
