Böyük Britaniyanın keçmiş baş naziri (2022-2024) Rişi Sunak “Microsoft” şirkətinin baş məsləhətçisi olub.
Yeniavaz.com xəbər verir ki, bu barədə Böyük Britaniyanın müstəqil hökumət orqanı olan Biznes Təyinatları üzrə Məsləhət Komitəsi (BAAC) bildirib.
45 yaşlı Sunak ştatdankənar məsləhətçi kimi fəaliyyət göstərəcək və maaşını uşaqların riyazi bacarıqlarının inkişafına kömək edən “The Richmond Project” xeyriyyə təşkilatına bağışlayacaq. O, həmçinin “Claude” chatbotunu hazırlayan Amerikanın “Anthropic” texnologiya şirkətidə məsləhətçi olacaq.
Qeyd edək ki, iyul ayında Sunak 2000-2004-cü illərdə işlədiyi Amerikanın “Goldman Sachs” investisiya bankında da baş məsləhətçi vəzifəsini qəbul edib. Yanvar ayında keçmiş baş nazir Kaliforniyanın Stenford Universitetində fəaliyyət göstərən Huver İnstitutunda qonaq mühazirəçi, Oksford Universitetinin Leonard Blavatnik adına Hökumət Məktəbində isə fəxri üzv olub.