Hökumətin proqramı çərçivəsində Ermənistan ordusunda çağırışçıların xidmət müddətinin azaldılması müqavilə əsasında xidmət edənlərin sayının artırılması ilə təmin olunacaq.
APA xəbər verir ki, bu barədə Ermənistan mediası ölkənin müdafiə naziri Suren Papikyana istinadən məluma yayıb.
“Vətən müdafiəçisi proqramı üzrə bir çox əsgər uzun illər orduda qalmaq qərarına gəlib. Bu rəqəm artıq bir neçə min nəfərə çatır. Yəni ordunu azaldırıq demək yersizdir”, – o qeyd edib.
Xatırladaq ki, 21 oktyabrda Ermənistanın baş naziri Nikol Paşinyan bildirmişdi ki, çağırışçıların hərbi xidmət müddətinin azaldılması haqqında qanun planlaşdırılandan əvvəl qüvvəyə minəcək. Qanun qəbul olunarsa, 2026-cı ilin qış çağırışından başlayaraq xidmət müddəti 2 il yox, 1,5 il olacaq.
