Son illərdə “manifestasiya” anlayışı həm sosial şəbəkələrdə, həm də şəxsi inkişaf sahəsində ən çox danışılan mövzulardan birinə çevrilib. İnsanlar inanmağa başlayıblar ki, düşüncələrimizin gücü həyatımızın istiqamətini dəyişə bilər. Manifestasiya dedikdə, bir arzunun və ya məqsədin əvvəlcə zehində, sonra isə real həyatda formalaşdırılması prosesi nəzərdə tutulur. Yəni insan istədiyi şeyi bütün varlığı ilə hiss edir, təsəvvür edir, inanır və bu inam dalğası ilə onu reallığa çəkir.
Əslində bu anlayış yeni deyil. Qədim dövrlərdən bəri insanlar düşüncənin və enerjinin kainata təsir göstərdiyinə inanırdılar. Müasir manifestasiya isə bu qədim inancın psixoloji və motivasiya yönümlü təzahürüdür. O, “cazibə qanunu” prinsiplərinə əsaslanır: insan nəyə diqqət yetirirsə, nə barədə çox düşünürsə, həyatına da onu cəlb edir. Yəni mənfi düşüncələr mənfi hadisələri, müsbət düşüncələr isə uğurlu nəticələri gətirir.
Manifestasiyanın əsas qayəsi budur: istəkləri sadəcə arzulamaq deyil, onları reallaşdıra biləcəyinə inanmaq. Bu, həm düşüncə, həm duyğu, həm də davranış səviyyəsində baş verir. Bir insan istədiyi şeyin artıq öz həyatında olduğunu zehində canlandırır, həmin duyğunu yaşayır, bu inamı gündəlik hərəkətlərinə əlavə edir. Bu zaman beyin bu vəziyyəti real kimi qəbul edir və məqsədə uyğun hərəkət mexanizmlərini işə salır.
Müasir psixoloqlar bildirirlər ki, manifestasiyanın uğuru sadəcə “mistik cazibə” ilə bağlı deyil. İnsan bir məqsədə fokuslananda, onunla bağlı imkanları daha tez görür, qərar verməkdə tərəddüd etmir və düşünülmüş addımlar atır. Yəni manifestasiya həm də beynin diqqət yönəltmə və motivasiya mexanizmlərini hərəkətə gətirən psixoloji prosesdir.
Lakin burada bir incə məqam var: sadəcə arzu etmək kifayət deyil. Manifestasiya inam, səbir və real addımlar tələb edir. Düşüncə ilə hərəkət bir-birini tamamlamadıqda nəticə əldə etmək çətin olur. Arzunu canlandırmaq başlanğıcdır, onu gerçəkləşdirmək isə fəaliyyətlə mümkündür. Məsələn, uğurlu karyera, sağlam münasibət və ya maliyyə bolluğu arzulayan insan bu məqsədlə uyğun seçimlər etməli, daxili inancını davranışa çevirməlidir.
Manifestasiyanın gücü həm də emosional vəziyyətdə gizlidir. Qorxu, şübhə və mənfi enerjilər arzuların reallaşmasına mane olur. Buna görə də müasir manifest praktikasında “yüksək vibrasiyada qalmaq” dedikləri anlayış mühüm rol oynayır — yəni sevinc, minnətdarlıq, ümid kimi duyğuların içində olmaq. Bu duyğular həm zehni, həm də enerjisel səviyyədə insanın həyatına daha müsbət hadisələri cəlb edir.
